ཚེས ༧ ཉིན་གྱི་སྔ་དྲོ། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཆུ་ལོག་གི་གནོད་འཚེ་ཕོག་པའི་ཧར་པིན་ཧྲང་ཀྲེ་གྲོང་ཁྱེར་ལའོ་ཅེ་ཅི་ཤང་ལུང་ཝང་མེའོ་གྲོང་ཚོར་ཕེབས་ཤིང་། ཞིང་ཁའི་ནང་ཕེབས་ནས་ཆུ་འབྲས་ལ་གནོད་འཚེ་ཕོག་པའི་གནས་ཚུལ་ལ་གཟིགས་པ་དང་། ཞབས་ཐང་མར་གྲོང་ཚོའི་རྒྱ་ལམ་ཐོག་ཕེབས་ནས་གཞོགས་གཉིས་ཀྱི་གཏོར་སྐྱོན་ཕོག་པའི་ཁང་པ་དང་རྨང་གཞིའི་སྒྲིག་ཆས་ཉམས་བཟོ་བསྐྱར་སྐྲུན་གྱི་འཕེལ་རིམ་ལ་གཟིགས་ཞིབ་གནང་བ་མ་ཟད། གྲོང་མིའི་ཁྱིམ་དུ་ཕེབས་ནས་འཚམས་འདྲི་གནང་བ་དང་། ཁྱིམ་གྱི་གནོད་འཚེའི་གནས་ཚུལ་དང་འཚོ་བ་འགན་སྲུང་གི་གནས་ཚུལ་ཐད་མཁྱེན་རྟོགས་ཞིབ་ཕྲ་གནང་ཡོད་ཅིང་། ཚང་མས་ཆོད་སེམས་བརྟན་པོ་འཆང་བ་དང་དཀའ་ངལ་ལས་རྒྱལ་བར་བྱས་ཏེ། སྔ་ཙམ་རྒྱུན་གཏན་གྱི་ཐོན་སྐྱེད་དང་འཚོ་བའི་སྒྲིག་ལམ་སླར་གསོ་ཐུབ་པ་དང་འཚོ་བ་སྔར་བས་ལེགས་སུ་འགྲོ་བ་བྱ་རྒྱུའི་ཐུགས་རེ་གནང་འདུག།