ཉེ་ཆར། གསར་འགོད་པར་རང་སྐྱོང་ལྗོངས་མི་སྤྱི་ཐིང་ནས་ཤེས་རྟོགས་བྱུང་བར། འབྲེལ་ཡོད་ཀྱི་གྲངས་གཞི་ལ་གཞིགས་ན། ད་ལོ། ལྗོངས་ཡོངས་སུ་ལོ་འདི་གའི་མཐོ་སློབ་སློབ་ཐོན་སློབ་མ་ཁྲི ༢.༩༧ ཟིན་པ་དེ་སླང་ཡང་སློབ་ཐོན་སློབ་མ་མང་ཤོས་ཀྱི་ཟིན་ཐོ་བཏོད་ཡོད།

གསར་འགོད་པར་ཤེས་རྟོགས་བྱུང་བར། འདི་ལོ་ཚུན་དུ། རང་སྐྱོང་ལྗོངས་མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ཀྱི་ལས་དོན་འགོ་ཁྲིད་ཚོགས་ཆུང་གིས་མཐོ་སློབ་སློབ་ཐོན་སློབ་མའི་ལས་ཞུགས་ཀྱི་གནད་དོན་དེ་དམངས་འཚོའི་བྱ་བ་གལ་ཆེན་ལ་བརྩིས་ནས་དམ་འཛིན་བྱས་པ་དང་། རང་སྐྱོང་ལྗོངས་དང་། གྲོང་ཁྱེར། རྫོང་བཅས་རིམ་པ་གསུམ་གྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་སྡེ་ཚན་གྱིས་ན་ནིང་གི་ཟླ་བཅུ་གཉིས་པ་ནས ༢༠༢༡ ལོའི་འབྲེལ་ཡོད་ཀྱི་ལས་དོན་སྔ་སྣུར་དུ་སྤེལ་ཡོད་ཅིང་། མིག་སྔར་ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ཏན་ཏིག་དང་གོ་རིམ་ལྡན་པའི་ངང་སྤེལ་བཞིན་ཡོད་པ་རེད།

ལྗོངས་ཡོངས་ཀྱི་ལོ་འདི་གའི་མཐོ་སློབ་སློབ་ཐོན་སློབ་མའི་ཆེད་ལས་ཁག་རིགས་ཆེ་གྲས ༢༠ ལ་དབྱེ་ནས། ཆེད་ལས་ལ་གཞིགས་ནས་བོད་སྐྱོར་ཞིང་ཆེན་དང་གྲོང་ཁྱེར་ཁག་ལ་མཁོ་འདོན་བྱས་ཏེ། འཆར་གཞི་ཡོད་པ་དང་དམིགས་ས་ཡོད་པའི་སྒོ་ནས་ལས་གནས་གསར་པ་མཁོ་འདོན་བྱ་རྒྱུ་ཡིན་པ་རེད། འདི་ལོ་ཚུན་དུ། ཁག་ཐེངས་གཉིས་ལ་བགོས་ནས་ལས་གནས་ཁྲི ༤.༥ མཁོ་འདོན་བྱས་པ་དང་། ལྗོངས་ཕྱིར་ལས་ཞུགས་ལས་གནས་ཁྲི ༡.༩ མཁོ་འདོན་བྱས་པས། སྔོན་དཔག་བྱས་ན་ལོ་ཧྲིལ་པོར་ལས་གནས་ཁྲི ༧ ཙམ་མཁོ་འདོན་བྱ་རྒྱུ་ཡིན་པས་ལས་གནས་འབྲེལ་མཐུད་འགན་ལེན་གྱི་ལས་དོན་ལ་སྐུལ་འདེད་ནུས་ལྡན་ཐུབ་ཡོད། །