རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཟླ ༩ ཚེས ༡༤ ཉིན་སུའེ་ཙེར་རྒྱལ་ཕྲན་མཉམ་འབྲེལ་གྱི་ཀྲུའུ་ཞི་ཁའེ་ལེ-ཙུའུ་ཐེའར་དང་ཕན་ཚུན་རྟེན་འབྲེལ་གློག་འཕྲིན་བཏང་ནས། རྒྱལ་ཁབ་གཉིས་པོའི་དབར་ཕྱི་འབྲེལ་བཙུགས་ནས་ལོ ༧༥ འཁོར་བར་རྟེན་འབྲེལ་ཞུས་གནང་བ་རེད།

ཞི་ཅིན་ཕིང་གིས། ཀྲུང་གོ་དང་སུའེ་ཙེར་ནི་སྤྱི་ཚོགས་ལམ་ལུགས་མི་འདྲ་བ་དང་འཕེལ་རྒྱས་དུས་མཚམས་མི་འདྲ་བའི་རྒྱལ་ཁབ་དབར་མཛའ་མཐུན་མཉམ་ལས་བྱེད་པའི་དཔེ་མཚོན་ཡིན། ཕྱི་འབྲེལ་བཙུགས་ནས་ལོ ༧༥ སོང་རིང་། ཕྱོགས་གཉིས་པོས་ལག་གདང་སྦྲེལ་ནས་འདྲ་མཉམ་དང་། གསར་གཏོད། མཉམ་རྒྱལ་བཅས་ཀྱི་ཀྲུང་གོ་དང་སུའེ་ཙེར་གྱི་མཉམ་ལས་སྙིང་སྟོབས་སྐྱེད་སྲིང་བྱས་པས། ཕྱོགས་གཉིས་དང་ཕྱོགས་མང་ཁྱབ་ཁོངས་ཀྱི་མཉམ་ལས་ལ་གཡུར་ཟའི་གྲུབ་འབྲས་ཐོབ་ཡོད་པ་དང་། རྒྱལ་ཁབ་གཉིས་པོའི་མི་དམངས་ཀྱི་བདེ་སྐྱིད་ཆེ་རུ་ཕྱིན་ཡོད་ཅིང་། ཕྱོགས་མང་རིང་ལུགས་དང་རང་མོས་ཉོ་ཚོང་སྲུང་སྐྱོང་བྱ་ཆེད་དགེ་མཚན་ལྡན་པའི་ལེགས་སྐྱེས་ཕུལ་ཡོད། ང་རང་ནས་ཀྲུང་གོ་དང་སུའེ་ཙེར་གྱི་འབྲེལ་བ་འཕེལ་རྒྱས་གཏོང་རྒྱུར་ཚད་མཐོའི་མཐོང་ཆེན་བྱེད་ཀྱི་ཡོད་པ་དང་། ཀྲུའུ་ཞི་ཁའེ་ལེ-ཙུའུ་ཐེའར་དང་མཉམ་དུ་འབད་བརྩོན་བྱས་ཐོག ཕྱི་འབྲེལ་བཙུགས་ནས་ལོ ༧༥ འཁོར་བ་གོ་སྐབས་སུ་བྱས་ཏེ། དཔལ་འབྱོར་ཉོ་ཚོང་དང་ནོར་སྲིད་དངུལ་རྩའི་མཉམ་ལས་དང་མི་ཆོས་རིག་གནས་ཀྱི་སྤེལ་རེས་གཏིང་ཟབ་ཏུ་གཏོང་བ་དང་། ཀྲུང་གོ་དང་སུའེ་ཙེར་གྱི་གསར་གཏོད་འཐབ་ཇུས་རོགས་ཟླའི་འབྲེལ་བ་ཆུ་ཚད་གསར་པ་ཞིག་ཏུ་མཐོ་རུ་བཏང་ནས། འདྲ་མཉམ་དང་གོ་རིམ་ལྡན་པའི་འཛམ་གླིང་སྣ་མང་ཅན་དང་ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བར་སྐུལ་འདེད་གཏོང་ཆེད་ལེགས་སྐྱེས་གསར་པ་འབུལ་འདོད་ཡོད་ཅེས་བསྟན་གནང་ཡོད།

ཁའེ་ལེ-ཙུའུ་ཐེའར་གྱིས། ལོ ༧༥ སོང་རིང་། སུའེ་ཙེར་དང་ཀྲུང་གོ་རྒྱལ་ཁབ་གཉིས་ཀྱིས་སྤེལ་རེས་དང་སྐད་ཆ་ཤོད་རེས་དང་། ཕན་ཚུན་བརྩི་འཇོག དངོས་གཉེར་མཉམ་ལས་བཅས་མཐའ་འཁྱོངས་བྱས་ཏེ། སྣ་མང་དང་སྲ་ཞིང་བརྟན་པའི་རོགས་ཟླའི་འབྲེལ་བ་བཙུགས་ཡོད། ༢༠༡༤ ལོར་རྒྱལ་ཁབ་གཉིས་པོའི་རང་མོས་ཉོ་ཚོང་གྲོས་ཆོད་ལ་ནུས་པ་ཐོན་པ་དང་། ༢༠༡༦ ལོར་གསར་གཏོད་འཐབ་ཇུས་རོགས་ཟླའི་འབྲེལ་བ་གཏན་འཁེལ་བྱས་པ་ཚང་མ་ནི་སུའེ་ཙེར་དང་ཀྲུང་གོའི་འབྲེལ་བའི་ལམ་ཚད་རྡོ་རིང་ལྟ་བུ་ཡིན་པ་དང་། དེས་ཕྱོགས་གཉིས་པོའི་ཁྱབ་ཁོངས་ཁག་གི་མཉམ་ལས་རྒྱུན་ཆད་མེད་པར་རྒྱ་ཆེར་དང་གཏིང་ཟབ་ཏུ་འགྲོ་བ་མཚོན་གྱི་ཡོད། འབྱུང་འགྱུར་ལ་ཁ་ཕྱོགས་སྐབས། སུའེ་ཙེར་གྱིས་ཀྲུང་གོའི་དབར་སྤེལ་རེས་མཉམ་ལས་མུ་མཐུད་གཏིང་ཟབ་ཏུ་བཏང་སྟེ། རྒྱལ་ཁབ་གཉིས་པོའི་ཡུན་རིང་མཛའ་གྲོགས་འབྲེལ་བ་གཏིང་ཟབ་ཏུ་གཏོང་འདོད་ཡོད་ཅེས་གསུངས་པ་རེད།།