ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚེས ༢༦ ཉིན་གྱི་ཕྱི་དྲོ་ཝེ་ཐེ་ནམ་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི་སུའུ་ལིན་དང་ཞལ་པར་ཐོག་ནས་བཀའ་མོལ་གནང་བ་རེད།

ཞི་ཅིན་ཕིང་གིས་ཝེ་ཐེ་ནམ་གུང་ཁྲན་ཏང་གི་ཚོགས་ཆེན་བཅུ་བཞི་པ་རྒྱལ་ཁའི་ངང་འཚོགས་པ་དང་སུའུ་ལིན་གྱིས་ཝེ་ཐེ་ནམ་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅིའི་འགན་གནས་བསྟུད་བཞེས་གནང་བར་བཀྲ་ཤིས་བདེ་ལེགས་ཞུས་པ་དང་། སྤྱི་ཁྱབ་ཧྲུའུ་ཅི་སུའུ་ལིན་གྱིས་འགོ་ཁྲིད་གནང་བའི་ཝེ་ཐེ་ནམ་གུང་ཁྲན་ཏང་ཀྲུང་དབྱང་གི་འགོ་ཁྲིད་འོག ཝེ་ཐེ་ནམ་གྱིས་ཝེ་ཐེ་ནམ་གུང་ཁྲན་ཏང་གི་ཚོགས་ཆེན་བཅུ་བཞི་པའི་ཐོག་བཏོན་པའི་དམིགས་འབེན་ལས་འགན་ཁག་ལེགས་འགྲུབ་ཐུབ་ངེས་ཡིན་པ་དང་། གང་སྔ་ཝེ་ཐེ་ནམ་གྱི་ལོ་བརྒྱ་གཉིས་ཀྱི་འབད་འཐབ་དམིགས་འབེན་མངོན་འགྱུར་ཐུབ་ངེས་ཡིན་པར་ཡིད་ཆེས་ཡོད་ཅེས་བསྟན་གནང་བ་དང་། ཀྲུང་གོ་དང་ཝེ་ཐེ་ནམ་གྱིས་ལམ་ལུགས་ལ་འགྱུར་བ་མི་གཏོང་བ་དང་ཕུགས་འདུན་མི་འགྱུར་བ་མཐའ་འཁྱོངས་བྱས་ཐོག མཐུན་སྒྲིལ་མཉམ་ལས་ལ་བརྟེན་ནས་གོང་འཕེལ་ལ་སྐུལ་འདེད་གཏོང་བ་དང་། ལག་གདང་སྦྲེལ་ནས་མཛེས་སྡུག་ལྡན་པའི་འབྱུང་འགྱུར་གྱི་ཕྱོགས་སུ་སྐྱོད་དགོས་ཞེས་བསྟན་གནང་ཡོད།

ཞི་ཅིན་ཕིང་གིས། མིག་སྔར་ཀྲུང་གོ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་བསྐྲུན་ཚར་བ་བྱ་རྒྱུ་དང་ལོ་བརྒྱ་ཐམ་པ་གཉིས་པའི་འབད་འཐབ་དམིགས་འབེན་མངོན་འགྱུར་ཡོང་བ་བྱེད་པའི་ཕྱོགས་སུ་མདུན་སྐྱོད་བྱེད་བཞིན་ཡོད་པ་དང་། ཝེ་ཐེ་ནམ་གྱིས་ཀྱང་མི་རིགས་གོང་འཕེལ་གྱི་དུས་རབས་གསར་པའི་འགོ་བརྩམས་ཡོད། ང་ཚོས་ངེས་པར་དུ་ཆོད་སེམས་བརྟན་གཏོང་དང་། དྲང་སྲུང་གསར་གཏོད་བྱས་ནས། ཉེན་ཁ་དང་འགྲན་རྩོད་སྣ་ཚོགས་སྔོན་འགོག་དང་ཐག་གཅོད་བྱེད་པ་དང་། སྤྱི་ཚོགས་རིང་ལུགས་ཀྱི་བྱ་གཞག་ལ་ཐུན་མོང་ཐོག་སྲུང་སྐྱོང་བྱས་ཏེ། ཀྲུང་གོ་དང་ཝེ་ཐེ་ནམ་གྱི་འབྲེལ་བའི་ཆབ་སྲིད་ཀྱི་རང་མདོག་མི་ཉམས་པར་བྱེད་དགོས། ཕྱོགས་གཉིས་པོས་ཏང་སྐྱོང་རྒྱལ་སྐྱོང་གི་ཉམས་མྱོང་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་མུ་མཐུད་ཤུགས་སྣོན་རྒྱག་པ་དང་། མཐོ་རིམ་བར་གྱི་ཐུག་འཕྲད་དང་། རིགས་གཞུང་ཞིབ་བསྡུར། ལས་བྱེད་པ་གསོ་སྐྱོང་སོགས་ཀྱི་ལམ་སྲོལ་བེད་སྤྱོད་ཡག་པོ་བྱས་ཏེ། ཏང་གི་སྲིད་སྐྱོང་ཆུ་ཚད་དང་རྒྱལ་ཁབ་བཅོས་སྐྱོང་གི་ནུས་པ་ཟམ་མི་ཆད་པར་ཆེ་རུ་གཏོང་དགོས། ཕྱོགས་གཉིས་པོས་གོང་འཕེལ་གྱི་འཐབ་ཇུས་འབྲེལ་མཐུད་ལ་ཤུགས་སྣོན་རྒྱག་པ་དང་། ཆུ་ཚད་མཐོ་བའི་གཉིས་ཕན་མཉམ་ལས་ཟབ་ཏུ་བཏང་སྟེ། རྒྱལ་ཁབ་གཉིས་པོའི་མི་དམངས་ལ་ཕན་བདེ་དེ་བས་མང་བ་བསྐྲུན་པ་དང་། སྤྱི་ཚོགས་རིང་ལུགས་དེང་རབས་ཅན་གྱི་ཕྱོགས་སུ་མཉམ་དུ་སྐྱོད་དགོས། ཕྱོགས་གཉིས་པོས་རྒྱལ་སྤྱི་དང་ས་ཁུལ་གྱི་བྱ་དོན་ཁྲོད་ཀྱི་མཐུན་སྦྱོར་གཞོགས་འདེགས་ལ་ཤུགས་སྣོན་བརྒྱབ་ནས། བཙན་དབང་རིང་ལུགས་དང་དཔུང་ཚོགས་འགྲན་རྒོལ་ལ་མཉམ་དུ་ངོ་རྒོལ་བྱེད་པ་དང་། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྱོང་ལ་མཉམ་དུ་སྐུལ་འདེད་གཏོང་དགོས་ཞེས་ནན་སྟོན་གནང་ཡོད།

སུའུ་ལིན་གྱིས་ཀྲུང་གུང་ཀྲུང་དབྱང་གིས་ཝེ་ཐེ་ནམ་གུང་ཁྲན་ཏང་གི་ཚོགས་ཆེན་བཅུ་བཞི་པ་རྒྱལ་ཁའི་ངང་འཚོགས་པར་རྟེན་འབྲེལ་གློག་འཕྲིན་བཏང་བར་ཐུགས་རྗེ་ཆེ་ཞུས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁོང་སླར་ཡང་ཝེ་ཐེ་ནམ་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅིར་བདམས་ཐོན་བྱུང་བར་སྨོན་འདུན་བཟང་པོ་ཞུས་པར་ཐུགས་རྗེ་ཆེ་ཞུས་པ། ཝེ་ཐེ་ནམ་གུང་ཁྲན་ཏང་གི་ཚོགས་ཆེན་བཅུ་བཞི་པའི་གྲུབ་འབྲས་གཙོ་བོ་གཙོ་གནད་ཐོག་ངོ་སྤྲོད་གནང་ཞིང་། ཝེ་ཐེ་ནམ་གྱིས་རྒྱང་ལམ་གསར་པའི་ཐོག་ཀྲུང་གོ་ཕྱོགས་དང་ལག་གདང་དཔུང་སྦྲེལ་བྱས་ཏེ།  སྔར་ལས་ལྷག་པ་དྲུག་གི་བླང་བྱ་ལྟར། སྤྱི་ཚོགས་རིང་ལུགས་ཁྱིམ་མཚེས་རྒྱལ་ཁབ་བར་གྱི་མཛའ་གྲོགས་མཉམ་ལས་སྔར་བས་གཏིང་ཟབ་ཏུ་གཏོང་འདོད་ཡོད། ཀྲུང་གོའི་གོང་འཕེལ་གྱིས་སྔ་བར་ཕྱི་གསུམ་དུ་ཝེ་ཐེ་ནམ་གྱི་གོང་འཕེལ་ལ་བློ་འབྱེད་དང་རྩ་ཆེའི་ཉམས་མྱོང་མཁོ་འདོན་བྱེད་ཀྱི་ཡོད། ཝེ་ཐེ་ནམ་གྱིས་ཀྲུང་གོ་གཅིག་གི་སྲིད་ཇུས་མཐའ་འཁྱོངས་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་པའི་མིའི་རིགས་ཀྱི་ལས་དབང་གཅིག་མཐུན་ཚོགས་པའི་འདུ་ཤེས་དང་རྒྱུད་གཅིག་ལམ་གཅིག་གི་གྲོས་འགོ་དེ་བཞིན་གོ་ལ་ཧྲིལ་པོའི་གྲོས་འགོ་ཆེན་པོ་བཞི་བཅས་ལ་མུ་མཐུད་རྒྱབ་སྐྱོར་ཞུ་རྒྱུ་དང་། ཀྲུང་གོ་ཕྱོགས་དང་ཆབ་སྲིད་ཐད་ཀྱི་ཡིད་ཆེས་ཟབ་ཏུ་གཏོང་བ་དང་། ཕྱི་འབྲེལ་རྒྱལ་སྲུང་དང་སྤྱི་བདེའི་རོགས་ལས་ལ་སྐུལ་འདེད་གཏོང་བ། ཁྱབ་ཁོངས་ཁག་གི་དངོས་གཉེར་མཉམ་ལས་གཏིང་ཟབ་ཏུ་གཏོང་བ། རྒྱལ་ཁབ་གཉིས་པོའི་མི་དམངས་ཀྱི་མཛའ་གྲོགས་མཐུན་ལམ་གསོ་སྤེལ་བྱེད་པ། རྙོག་འཛིང་དང་འགྱུར་ལྡོག་ཆེ་བའི་རྒྱལ་སྤྱིའི་དུས་བབ་འོག་ཏུ་མཐུན་སྦྱོར་བྱ་རྒྱུར་ཤུགས་སྣོན་རྒྱག་པ། ཕྱོགས་མང་རིང་ལུགས་དར་སྤེལ་གཏོང་བ། སྲུང་སྐྱོབ་རིང་ལུགས་ལ་ངོ་རྒོལ་བྱེད་པ་བཅས་བྱས་ཏེ། ཝེ་ཐེ་ནམ་དང་ཀྲུང་གོའི་ལས་དབང་གཅིག་མཐུན་ཚོགས་པ་འཛུགས་སྐྱོང་ལ་སྐུལ་འདེད་གཏོང་འདོད་ཡོད་གསུངས་པ་རེད།

ཞི་ཅིན་ཕིང་དང་སུའུ་ལིན་གྱིས་ད་དུང་ཕན་ཚུན་དབར་ལོ་གསར་གྱི་འཚམས་འདྲི་ཞུས་པ་དང་། རྒྱལ་ཁབ་གཉིས་པོའི་མི་དམངས་བདེ་སྐྱིད་ཁམས་བཟང་ཡོང་བའི་སྨོན་འདུན་ཞུས་གནང་ཡོད། །