ཉེ་ཆར་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་པེ་ཅིང་དང་ཧོ་པེར་རྟོག་ཞིབ་གནང་བ་དང་པེ་ཅིང་གི ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་ཀྱི་གྲ་སྒྲིག་ལས་དོན་གྱི་སྙན་སེང་ཚོགས་འདུ་གཙོ་སྐྱོང་གནང་བ་དང་འབྲེལ། གསུང་བཤད་གལ་ཆེན་ཡང་གནང་བ་རེད།

ཞི་ཅིན་ཕིང་གིས་ནན་གསུང་གནང་དོན། པེ་ཅིང་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་ཡག་པོ་གཉེར་རྒྱུ་ནི་ཏང་དང་རྒྱལ་ཁབ་ཀྱི་དོན་ཆེན་ཞིག་དང་ང་ཚོས་རྒྱལ་སྤྱིའི་སྤྱི་ཚོགས་ལ་བཞག་པའི་བརྗིད་ཆེའི་དམ་བཅའ་ཡིན། པེ་ཅིང་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་ཀྱི་གྲ་སྒྲིག་ལས་དོན་ཡག་པོ་བསྒྲུབ་པའི་ལས་འགན་གཟི་བརྗིད་ལྡན་པ་ཞིག་རེད་ལ་དོན་སྙིང་གལ་ཆེན་ཡང་ལྡན་ཡོད། གདེང་ཚོད་བརྟན་པོ་དང་། འབད་འབུངས་ཡར་བརྩོན། ཡག་ཐོག་ཡག་བརྩེགས། དཀའ་ངལ་ལས་རྣམ་པར་རྒྱལ་བ་བཅས་བྱས་ཏེ་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་ནན་ཏན་བྱེད་པ་དང་། ལྗང་མདོག་དང་། མཉམ་སྤྱོད། སྒོ་དབྱེ། སྤྱོད་གཙང་བཅས་ཀྱི་ཐོག་ནས་ཨོ་རྩལ་འགྲན་ཚོགས་གཉེར་རྒྱུ་དེ་གྲ་སྒྲིག་ལས་དོན་གྱི་བརྒྱུད་རིམ་ཧྲིལ་པོའི་ནང་ཁྱབ་པར་བྱེད་པ། གྲ་སྒྲིག་ལས་དོན་ཁག་ནུས་ཤུགས་ཡོད་རྒུས་ཡག་པོ་སྒྲུབ་པ་བཅས་བྱས་ནས་འཛམ་གླིང་ལ་ངོ་མཚར་ཆེ་བ་དང་། སྤྱིར་བཏང་མིན་པ། ཁྱད་དུ་འཕགས་པའི་ཨོ་རྩལ་འགྲན་ཚོགས་གཟབ་རྒྱས་ཤིག་ཧུར་ཐག་གཉེར་དགོས།

ཞི་ཅིན་ཕིང་གིས་བསྟན་གནང་དོན། ལུས་རྩལ་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པ་ནི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་དམིགས་ཚད་གལ་ཆེན་ཞིག་ཡིན། ལུས་རྩལ་སྟོབས་ཆེན་རྒྱལ་ཁབ་ཀྱི་རྨང་གཞི་དེ་མང་ཚོགས་ལུས་རྩལ་ལ་ཐུག་ཡོད། པེ་ཅིང་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་གཉེར་ནས་རང་རྒྱལ་གྱི་གངས་འཁྱག་ལུས་རྩལ་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་བ་དང་ལུས་རྩལ་རྣམ་གྲངས་མི་འདང་བ་དེ་གསབ་པ་དང་རྣམ་གྲངས་ཞན་པ་དེ་སྟོབས་ཆེར་བཏང་སྟེ་རྩལ་འགྲན་ལུས་རྩལ་སྟོབས་ཆེ་བ་དང་། མང་ཚོགས་ལུས་རྩལ་སྟོབས་ཞན་པ། དབྱར་དྲག་དགུན་ཞན། འཁྱགས་དྲག་གངས་ཞན་བཅས་ཀྱི་གནད་དོན་རིམ་བཞིན་ཐག་གཅོད་བྱས་ནས་དུས་རབས་གསར་པའི་ལུས་རྩལ་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།

ཞི་ཅིན་ཕིང་གིས་བསྟན་གནང་དོན། གྲ་སྒྲིག་ལས་དོན་ཁག་ཡག་ཐོག་ཡག་བརྩེགས་བྱེད་པ་དང་། དུས་བབ་གསར་པ་དང་ཟུང་འབྲེལ་བྱེད་པ། ལས་དོན་ཁག་ལ་སླར་ཡང་ཇུས་འགོད་དང་ལེགས་སྒྲིག་བཅས་བྱས་ནས་གྲ་སྒྲིག་ལས་དོན་གྱི་གཙོ་གནད་དེ་རིམས་ནད་སྔོན་འགོག་ཚོད་འཛིན་ལ་སྤྱི་འདོམས་དམ་འཛིན་ཡག་པོ་བྱེད་པ་དང་འགྲན་བསྡུར་སྒྲིག་འཛུགས་ཡག་པོ་བྱེད་པའི་ཐོག་འཇོག་དགོས། ཧྲག་བསྡུས་དང་བདེ་འཇགས། ངོ་མཚར་བཅས་ཀྱི་འགྲན་བསྡུར་གཉེར་བའི་བླང་བྱ་འབུར་དུ་ཐོན་པ་བྱས་ཏེ་ཕྱོགས་ཡོངས་ནས་ཉེན་ཁ་སྣ་ཚོགས་འགོག་སེལ་བྱེད་པ་དང་། འགྲན་བསྡུར་སྒྲིག་འཛུགས་དང་། འགྲན་བསྡུར་སྤེལ་རིང་གི་ཞབས་ཞུ། ཚན་རྩལ་བཀོལ་སྤྱོད། རིག་གནས་བྱེད་སྒོ་སོགས་གྲ་སྒྲིག་ལས་དོན་ཁག་ཞིབ་ཚགས་ངང་ཡག་པོ་བསྒྲུབས་ནས་རིམས་ནད་ཀྱི་ཉེན་ཁ་ཆུང་དུ་གཏོང་གང་ཐུབ་བྱེད་དགོས། །