ཞི་ཅིན་ཕིང་གིས་མཛུབ་སྟོན་གལ་ཆེན་གནང་ནས་བཟའ་བཏུང་འཕྲོ་བརླག་གཏོང་བའི་བྱ་སྤྱོད་གཏན་འགོག་མཐའ་གཅིག་ཏུ་བྱས་ཏེ། གྲོན་ཆུང་བྱེད་པའི་གོམས་གཤིས་ཡག་པོ་འཇགས་པ་དང་། སྤྱི་ཚོགས་ཡོངས་སུ་འཕྲོ་བརླག་གཏོང་བ་ནི་ངོ་ཚ་དང་གྲོན་ཆུང་ནི་གཟི་བརྗིད་ཡིན་པའི་རྣམ་པ་གཏོད་དགོས་པའི་ནན་སྟོན་གནང་བ།

ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ནས་སྤེལ་བའི་གནས་ཚུལ། ཉེ་ཆར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་བཟའ་བཏུང་འཕྲོ་བརླག་གཏོང་བའི་བྱ་སྤྱོད་གཏན་འགོག་བྱེད་པའི་ཐད་མཛུབ་སྟོན་གལ་ཆེན་གནང་ཡོད། ཁོང་གིས། བཟའ་བཏུང་འཕྲོ་བརླག་གཏོང་བའི་སྣང་ཚུལ་ནི་མཐོང་བ་ཙམ་གྱིས་ཧང་སངས་དགོས་པ་དང་བློ་ཕམ་དགོས་པ་ཞིག་རེད། སྡེར་མའི་ནང་གི་ཞལ་ཟས་དེ། རྔུལ་ཁྲག་དུ་མ་བཏོན་ནས་བྱུང་། མ་གཞི་རང་རྒྱལ་གྱི་འབྲུ་རིགས་ཐོན་སྐྱེད་ལ་ལོ་བསྟུད་མར་ལོ་ལེགས་བྱུང་ནའང་། འབྲུ་རིགས་བདེ་འཇགས་ཐད་སྔ་བར་ཕྱི་གསུམ་དུ་ཉེན་ཁ་ཡོད་པའི་འདུ་ཤེས་དགོས་ཤིང་། ད་ལོ་རྒྱལ་ཡོངས་སུ་ཐོན་པའི་ཏོག་གསར་གློ་ཚད་རིམས་ནད་ཀྱི་ཤུགས་རྐྱེན་གྱིས་ང་ཚོར་ཉེན་བརྡ་བཏང་ཡོད་ཅེས་དང་།

ཞི་ཅིན་ཕིང་གིས། ཁྲིམས་འཛུགས་ལ་ཤུགས་སྣོན་དང་། ལྟ་སྐུལ་དོ་དམ་ལ་ཤུགས་སྣོན། བྱ་ཐབས་ནུས་ལྡན་བཟུང་བ། ཕུགས་ཕན་སྒྲིག་གཞི་འཛུགས་པ་བཅས་བྱས་ཏེ། བཟའ་བཏུང་འཕྲོ་བརླག་གཏོང་བའི་བྱ་སྤྱོད་མཐའ་གཅིག་ཏུ་གཏན་འགོག་བྱེད་དགོས། དྲིལ་བསྒྲགས་སློབ་གསོར་ཤུགས་སྣོན་སྔར་ལས་ལྷག་པ་རྒྱག་པ་དང་། གྲོན་ཆུང་གི་གོམས་གཤིས་ཡག་པོ་འཇགས་པ་བྱས་ཏེ། སྤྱི་ཚོགས་ཡོངས་སུ་འཕྲོ་བརླག་ནི་ངོ་ཚ་དང་གྲོན་ཆུང་ནི་གཟི་བརྗིད་ཡིན་པའི་རྣམ་པ་གཏོད་དགོས་ཞེས་ནན་སྟོན་གནང་ཡོད།

ཞི་ཅིན་ཕིང་ནས་སྔ་བར་ཕྱི་གསུམ་དུ་འབྲུ་རིགས་བདེ་འཇགས་ལ་མཐོང་ཆེན་དང་། གྲོན་ཆུང་བསྲི་ཚགས་བྱེད་པ་དང་འཕྲོ་བརླག་ལ་ངོ་རྒོལ་བྱེད་པའི་སྤྱི་ཚོགས་ཀྱི་དར་སྲོལ་དར་སྤེལ་གཏོང་རྒྱུར་མཐོང་ཆེན་པོ་གནང་གི་ཡོད་པ་དང་། བཟའ་བཏུང་འཕྲོ་བརླག་གཏོང་བའི་བྱ་སྤྱོད་གཏན་འགོག་བྱེད་དགོས་པའི་ནན་སྟོན་ཐེངས་མང་གནང་ཡོད། སྤྱི་ལོ ༢༠༡༣ ལོའི་ཟླ ༡ པོར། ཞི་ཅིན་ཕིང་གིས། མཛུབ་སྟོན་གལ་ཆེན་གནང་ནས་གྲོན་ཆུང་བསྲི་ཚགས་བྱེད་པ་དང་། འཕྲོ་བརླག་གཏོང་བར་ངོ་རྒོལ་བྱེད་པའི་བླང་བྱ་བཏོན་གནང་ཡོད། དེ་རྗེས་ཞི་ཅིན་ཕིང་གིས་སླར་ཡང་མཛུབ་སྟོན་གལ་ཆེན་ཐེངས་མང་གནང་ནས་བཙན་ལ་ནན་པའི་ལམ་ལུགས་ཀྱི་གཅུན་སྡོམ་དང་། དོ་ནན་པའི་ལམ་ལུགས་ལག་བསྟར། ཤུགས་དྲག་ལྡན་པའི་ལྟ་སྐུལ་ཞིབ་བཤེར། ཆད་གཅོད་ཀྱི་སྒྲིག་སྲོལ་ནན་པོ་བཅས་ལ་བརྟེན་ནས། གཞུང་དངུལ་སྤྱད་དེ་འཛད་སྤྱོད་བྱེད་པའི་ཁྲིམས་འགལ་ལུགས་འགལ་གྱི་སྣང་ཚུལ་གཏན་འགོག་ཏན་ཏིག་བྱེད་དགོས་པ་མ་ཟད། སློབ་གྲྭ་ཁག་གཅིག་ཏུ་བཟའ་རིགས་འཕྲོ་བརླག་གཏོང་བ་དང་སློབ་མའི་གྲོན་ཆུང་གི་འདུ་ཤེས་མི་འདང་བའི་གནད་དོན་ཡོད་པར་དམིགས་ཏེ། ཁྲིད་སྟོན་དང་དོ་དམ་ལ་ཤུགས་སྣོན་ཏན་ཏིག་རྒྱག་པ་དང་། སློབ་མས་གྲོན་ཆུང་བསྲི་ཚགས་བྱེད་པའི་སྤྱོད་བཟང་སྐྱེད་སྲིང་བྱེད་པ་སོགས་ཀྱི་ཐད་བླང་བྱ་ཁ་གསལ་བཏོན་གནང་ཡོད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ས་ཁུལ་ཁག་དང་སྡེ་ཁག་ཁག་གིས་ཞི་ཅིན་ཕིང་གི་མཛུབ་སྟོན་གྱི་དགོངས་པ་གལ་ཆེན་ལག་བསྟར་དོན་འཁྱོལ་བྱས་པ་དང་། འབྲེལ་ཡོད་ཡིག་ཆ་བཏོན་པ། བཟའ་བཏུང་མ་གཙང་མ་སྤྱོད་པ་སོགས་ཀྱི་བྱ་ཐབས་བཏོན་ནས་འཕྲོ་བརླག་གཏོང་སྲོལ་བཅོས་སྒྲིག་ཤུགས་ཆེན་བྱས་པས། བཟའ་བཏུང་འཕྲོ་བརླག་གཏོང་བའི་སྣང་ཚུལ་ལེགས་བཅོས་བྱུང་བ་དང་། ལྷག་པར་དུ་མང་ཚོགས་ནས་བསམ་འཆར་ཆེན་པོ་ཡོད་པའི་གཞུང་དངུལ་སྤྱད་དེ་བཟའ་བཏུང་འཕྲོ་བརླག་གཏོང་བའི་བྱ་སྤྱོད་གཏན་འགོག་ནུས་ལྡན་བྱས་ཡོད། དེ་དང་ཆབས་ཅིག་ས་ཆ་ཁག་གཅིག་ཏུ་བཟའ་བཏུང་འཕྲོ་བརླག་གཏོང་བའི་སྣང་ཚུལ་སྔར་བཞིན་གནས་པས། འབྲེལ་ཡོད་སྡེ་ཁག་གིས་ཞི་ཅིན་ཕིང་གི་གལ་ཆེའི་མཛུབ་སྟོན་དགོངས་པ་ལག་བསྟར་དོན་འཁྱོལ་དང་། དེ་བས་ནུས་པ་ལྡན་པའི་བྱ་ཐབས་གཏན་འབེབས་ལག་བསྟར་བྱས་ཏེ། སྤྱི་ཚོགས་ཡོངས་ནས་བཟའ་བཏུང་འཕྲོ་བརླག་གཏོང་རྒྱུ་གཏན་འགོག་བྱེད་པའི་ལས་དོན་ལ་སྐུལ་འདེད་གཏིང་ཟབ་བཏང་ཡོད་པ་རེད།།