སྤྱི་ཚེས ༢༡ ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཞལ་ཆད་ལྟར་ལོ་སིའི་མི་དམངས་གསར་བརྗེ་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཐུང་ལུན་དང་ཞལ་པར་ཐོག་ནས་གླེང་མོལ་གནང་ཡོད་པ་རེད།

ཞི་ཅིན་ཕིང་གིས་ཀྲུང་གོའི་ཏང་དང་སྲིད་གཞུང་། མི་དམངས་བཅས་ཀྱི་ཚབ་ཞུས་ནས་ཐུང་ལུན་ལོ་སིའི་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅིར་བདམས་ཐོན་བྱུང་བར་བཀྲ་ཤིས་རྟེན་འབྲེལ་ཞུས་ཡོད། ཞི་ཅིན་ཕིང་གིས། ལོ་སིའི་ཏང་གི་ཚོགས་ཆེན་བཅུ་གཅིག་པ་རྒྱལ་ཁའི་ངང་སྐོང་འཚོགས་བྱས་པ་དེས་ཏང་དང་རྒྱལ་ཁབ་སྐྱོང་བའི་རིག་ལམ་གསར་པ་དང་བྱེད་ཐབས་གསར་པ་རབ་དང་རིམ་པ་བཏོན་ཡོད་པས། ལོ་སིའི་སྤྱི་ཚོགས་རིང་ལུགས་ཀྱི་བྱ་གཞག་རྒྱུན་ཆད་མེད་པར་མདུན་ཕྱོགས་སུ་གོང་འཕེལ་འགྲོ་རྒྱུར་སྐུལ་འདེད་གཏོང་བའི་ཐད་དོན་སྙིང་གལ་ཆེན་ལྡན་ཡོད། བློ་མཐུན་ཐུང་ལུན་གྱིས་གཙོ་འཛིན་གནང་བའི་སྐབས་གསར་པའི་ལོ་སིའི་ཏང་ཀྲུང་དབྱང་གི་འགོ་ཁྲིད་འོག ལོ་སིའི་ཏང་ཡོངས་དང་རྒྱལ་ཡོངས་མི་དམངས་རྣམས་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཚོགས་ཆེན་བཅུ་གཅིག་པའི་ཐོག་གཏན་ཁེལ་བྱས་པའི་དམིགས་འབེན་ལས་འགན་མངོན་འགྱུར་ཡོང་ཆེད་འབད་བརྩོན་ལྷོད་མེད་བྱེད་ངེས་ཡིན་པའི་ཡིད་ཆེས་ཡོད་ཅེས་གསུངས་གནང་ཡོད་པ་རེད།

ཞི་ཅིན་ཕིང་གིས། ཀྲུང་གོ་དང་ལོ་སི་ནི་རི་ཆུ་སྦྲེལ་བའི་མཛའ་གྲོགས་ཁྱིམ་མཚེས་ཡིན་པ་དང་། གུང་ཁྲན་ཏང་གི་འགོ་ཁྲིད་རྒྱུན་འཁྱོངས་དང་སྤྱི་ཚོགས་རིང་ལུགས་ཀྱི་ཁ་ཕྱོགས་རྒྱུན་འཁྱོངས་བྱེད་པ་དེ་ནི་ཀྲུང་གོ་དང་ལོ་སིའི་འབྲེལ་བའི་ངོ་བོའི་ཁྱད་ཆོས་ཤིག་རེད། མིག་སྔར། ཀྲུང་གོ་དང་ལོ་སིའི་འབྲེལ་བ་ལོ་རྒྱུས་ཀྱི་དུས་མཚམས་ཡག་ཤོས་སུ་སླེབས་ཡོད་པ་དང་། འཛམ་གླིང་ལ་ལོ་བརྒྱར་བྱུང་མ་མྱོང་བའི་འགྱུར་ལྡོག་ཆེན་མོ་དང་གོ་ལའི་རིམས་ནད་ཀྱི་ཤུགས་རྐྱེན་ཉིས་བརྩེགས་ཀྱི་མདུན་དུ་ཀྲུང་གོས་ལོ་སི་དང་མཉམ་དུ་མཐོ་རིམ་བར་གྱི་འགྲོ་འོང་སྔར་བས་ཟབ་ཏུ་གཏོང་བ་དང་། འཐབ་ཇུས་ཐད་ཀྱི་སྦྲེལ་མཐུད་ཤུགས་ཆེར་གཏོང་བ། ཏང་དང་རྒྱལ་ཁབ་སྐྱོང་བའི་ཉམས་མྱོང་སྤེལ་རེས་ཟབ་མོ་བྱེད་པ་བཅས་བྱ་འདོད་ཡོད། ཕྱོགས་གཉིས་པོས་ཀྲུང་གོ་དང་ལོ་སིའི་དཔལ་འབྱོར་བར་ཁྱམས་དང་ཀྲུང་གོ་དང་ལོ་སིའི་ལྕགས་ལམ་སོགས་རྣམ་གྲངས་ཆེན་མོའི་འཛུགས་སྐྲུན་ལ་བརྟན་པོའི་ངང་སྐུལ་འདེད་གཏོང་བ་དང་ཀྲུང་གོ་དང་ལོ་སིས་རྒྱུད་གཅིག་ལམ་གཅིག་མཉམ་སྐྲུན་བྱེད་པར་གཡུར་ཟའི་གྲུབ་འབྲས་ཐོབ་པ་བྱེད་དགོས། དུས་མཚུངས། ཕྱོགས་གཉིས་པོས་རིག་གནས་དང་གཞོན་ནུ། ཡུལ་སྐོར་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ཟབ་ཏུ་བཏང་ནས་ཀྲུང་གོ་དང་ལོ་སིའི་ལས་དབང་གཅིག་མཐུན་མ་ལག་གི་མི་ཆོས་རིག་གནས་ཀྱི་ནང་དོན་ཕུན་སུམ་ཇེ་ཚོགས་སུ་གཏོང་དགོས། ཀྲུང་གོས་ལོ་སིས་རིམས་ནད་འགོག་བཅོས་བྱེད་པའི་ཐད་མུ་མཐུད་རྒྱབ་སྐྱོར་ཞུ་རྒྱུ་དང་། ལོ་སིར་ཏོག་གསར་གློ་ཚད་ཀྱི་རིམས་འགོག་སྨན་ཁབ་ཁག་གཅིག་རོགས་སྐྱོར་བྱ་རྒྱུ་ཐད་བསམ་བློ་གཏོང་བཞིན་ཡོད། ཀྲུང་གོས་ལོ་སི་དང་མཉམ་དུ་རྒྱལ་སྤྱི་དང་ས་ཁུལ་གྱི་བྱ་དོན་ཁྲོད་དུ་མཐུན་སྦྱོར་དང་གཞོགས་འདེགས་བྱ་རྒྱུར་ཤུགས་སྣོན་བརྒྱབ་ནས་ཐུན་མོང་དར་རྒྱས་གོང་འཕེལ་ཡོང་རྒྱུར་སྐུལ་འདེད་གཏོང་རྒྱུ་ཡིན་ཞེས་གསུངས་གནང་བ་དང་། ཞི་ཅིན་ཕིང་གིས་ཐུང་ལུན་ལ་གལ་ཆེའི་ལས་གནས་གསར་པའི་ཐོག་གྲུབ་འབྲས་གསར་པ་དེ་བས་ཆེ་བ་ཐོབ་རྒྱུའི་སྨོན་འདུན་ཞུས་གནང་ཡོད་པ་རེད།

ཐུང་ལུན་གྱིས། བློ་མཐུན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལོ་སིའི་ཏང་གི་ཚོགས་ཆེན་བཅུ་གཅིག་པ་རྒྱལ་ཁའི་ངང་མཇུག་སྒྲིལ་མ་ཐག་ང་རང་ལ་ཞལ་པར་བསྐྱོན་པར་ཐུགས་རྗེ་ཆེ་ཞུ་རྒྱུ་ཡིན། དེའི་ཐོག་ནས་བློ་མཐུན་སྤྱི་ཁྱབ་ཧྲུའུ་ཅིས་ལོ་སི་དང་ཀྲུང་གོའི་འབྲེལ་བར་ཚད་མཐོའི་མཐོང་ཆེན་གནང་བ་དང་། ལོ་སི་དང་ཀྲུང་གོའི་ཏང་གཉིས་པོ་དང་རྒྱལ་ཁབ་གཉིས་པོ། རྒྱལ་ཁབ་གཉིས་པོའི་མི་དམངས་བཅས་ལ་བཅངས་པའི་མཛའ་སེམས་ཟབ་མོ་དང་སྲོལ་རྒྱུན་མཛའ་གྲོགས་མངོན་ཡོད། ད་ཐེངས་ལོ་སིའི་ཏང་གི་ཚོགས་ཆེན་བཅུ་གཅིག་པར་གྲུབ་འབྲས་གལ་ཆེན་རབ་དང་རིམ་པ་ཐོབ་ཡོད། ལོ་སིས་རྩ་དོན་དངམཐུན་པའི་ཁྱོན་ཡོངས་གསར་བརྗེའི་ལམ་བུ་རྒྱུན་འཁྱོངས་བྱེད་པ་དང་། མི་དམངས་ཀྱི་སྣེ་ཁྲིད་དེ་རྒྱལ་ཁ་གསར་པ་རབ་དང་རིམ་པ་ལེན་ནས། ལོ་སིའི་སྤྱི་ཚོགས་རིང་ལུགས་འཛུགས་སྐྲུན་ཆེད་སྲ་ཞིང་བརྟན་པའི་རྨང་གཞི་གདིང་རྒྱུ་ཡིན། ལོ་སིའི་ཕྱོགས་ནས་ཀྲུང་གོས་ལོ་སིའི་གོང་འཕེལ་གྱི་དུས་མཚམས་ཁག་དང་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ཐད་རྩ་ཆེའི་རྒྱབ་སྐྱོར་དང་རོགས་རམ་གནང་བར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་། ལོ་སི་དང་ཀྲུང་གོའི་ལས་དབང་གཅིག་མཐུན་མ་ལག་གི་བྱ་སྤྱོད་འཆར་གཞི་དོན་འཁྱོལ་བྱེད་པའི་ལས་དོན་ལ་མུ་མཐུད་སྐུལ་འདེད་གཏོང་རྒྱུ་དང་། ཀྲུང་གོའི་ཕྱོགས་དང་མཉམ་དུ་རྒྱུད་གཅིག་ལམ་གཅིག་མཉམ་སྐྲུན་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་པ། ཁྱབ་ཁོངས་ཁག་གི་མཛའ་གྲོགས་སྤེལ་རེས་ལ་སྐུལ་འདེད་གཏོང་བ་བཅས་བྱ་རྒྱུ་ཡིན། ལོ་སིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཀྲུང་གུང་ཀྲུང་དབྱང་གི་འགོ་ཁྲིད་འོག ཀྲུང་གོའི་མི་དམངས་ལ་སྒོ་ཀུན་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་ཐད་གྲུབ་འབྲས་གསར་པ་ཐོབ་ངེས་རེད་ལ། དུས་བཀག་ལྟར་སྔོན་གཏན་ཁེལ་བའི་འབད་འཐབ་དམིགས་འབེན་མངོན་འགྱུར་ཡོང་ངེས་ཡིན་པའི་ཡིད་ཆེས་ཡོད་ཅེས་གསུངས་ཡོད།

ཞལ་པར་བསྐྱོན་རིང་། ཞི་ཅིན་ཕིང་དང་ཐུང་ལུན་རྣམ་གཉིས་ནས་ཀྲུང་གོ་དང་ལོ་སིའི་མཛའ་གྲོགས་ལོ་འགོ་འཛུགས་རྒྱུ་མཉམ་དུ་ཁྱབ་བསྒྲགས་གནང་བ་དང་། རྟེན་འབྲེལ་བྱེད་སྒོ་རབ་དང་རིམ་པ་སྤེལ་ནས་ཀྲུང་གོ་དང་ལོ་སིའི་མཛའ་གྲོགས་བཟང་པོ་མི་སེམས་སུ་ཟུག་པ་བྱ་རྒྱུ་ཡིན་པ་རེད། །