རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚེས ༡༧ ཉིན་ཁུ་ཝེ་ཐེའི་ཨའེ་སྨིར་ནཱ་ཝ་ཧྥུ་སྟབས་མ་ལེགས་པར་སྐུ་གཤེགས་པར་ཁུ་ཝེ་ཐེའི་གསར་དུ་བསྐོ་གཞག་བྱས་པའི་ཨའེ་སྨིར་སྨི་ཧྲ་ལེ་ལ་མྱ་ངན་ཞུ་བའི་གློག་འཕྲིན་བཏང་གནང་ཡོད། ཞི་ཅིན་ཕིང་གིས་ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱི་ཚབ་ཞུས་པ་དང་འབྲེལ་ཁོང་མི་སྒེར་གྱི་ངོས་ནས་ཨའེ་སྨིར་ནཱ་ཝ་ཧྥུ་སྐུ་གཤེགས་པར་མྱ་ངན་ཟབ་མོ་ཞུས་པ་དང་། ཨའེ་སྨིར་ནཱ་ཝ་ཧྥུའི་གཉེན་ཉེ་དང་ཁུ་ཝེ་ཐེའི་མི་དམངས་ལ་ལྷག་བསམ་ཟོལ་མེད་ཀྱི་ཐུགས་གསོའི་འཚམས་འདྲི་ཞུས་གནང་བ་རེད།

ཞི་ཅིན་ཕིང་གིས། ཨའེ་སྨིར་ནཱ་ཝ་ཧྥུ་ལ་ཁུ་ཝེ་ཐེའི་མི་དམངས་ཀྱིས་གུས་བཀུར་ཆེན་པོ་ཞུ་གི་ཡོད། ཁོང་སྐུ་འཚོ་བཞུགས་སྐབས་ཀྲུང་གོ་དང་ཁུ་ཝེ་ཐེའི་འབྲེལ་བ་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་དགེ་མཚན་ལྡན་པའི་ལེགས་སྐྱེས་ཕུལ་ཡོད། ཁོང་སྟབས་མ་ལེགས་པར་སྐུ་གཤེགས་པ་ནི་ཁུ་ཝེ་ཐེའི་མི་དམངས་ཀྱི་གྱོང་གུན་ཆེན་པོ་ཞིག་ཡིན་ལ། ཀྲུང་གོ་མི་དམངས་ཀྱི་གྲོགས་པོ་བཟང་པོ་ཞིག་ཀྱང་མེད་པར་ཆགས་ཡོད། ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱིས་ཀྲུང་གོ་དང་ཁུ་ཝེ་ཐེ་རྒྱལ་ཁབ་གཉིས་པོའི་མཛའ་གྲོགས་ལ་མཐོང་ཧ་ཅང་ཆེན་པོ་བྱེད་ཀྱི་ཡོད། ཕྱོགས་གཉིས་པོའི་ཐུན་མོང་འབད་བརྩོན་འོག ཀྲུང་གོ་དང་ཁུ་ཝེ་ཐེ་རྒྱལ་ཁབ་གཉིས་པོའི་འཐབ་ཇུས་རོགས་ཟླའི་འབྲེལ་བ་ཟམ་མི་ཆད་པར་སྲ་བརྟན་དང་འཕེལ་རྒྱས་འགྲོ་ངེས་ཡིན་པའི་ཡིད་ཆེས་ཡོད་ཅེས་བསྟན་ཡོད།

ཉིན་དེར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་ནཱ་ཝ་ཧྥུ་སྟབས་མ་ལེགས་པར་སྐུ་གཤེགས་པའི་ཐད་ཁུ་ཝེ་ཐེའི་དབུ་བཞུགས་བློན་ཆེན་ཨའེ་ཧ་མའེ་ཏེར་མྱ་ངན་ཞུ་བའི་གློག་འཕྲིན་བཏང་སྟེ། ཁུ་ཝེ་ཐེའི་སྲིད་གཞུང་ལ་སེམས་སྡུག་ཆེན་པོས་མྱ་ངན་ཞུས་པ་དང་ཨའེ་སྨིར་ནཱ་ཝ་ཧྥུའི་ཁྱིམ་མིར་ལྷག་བསམ་ཟོལ་མེད་ཀྱི་འཚམས་འདྲི་ཞུས་པ་རེད།།