ཉིན་ཤས་གོང་དུ། གཞིས་རྩེ་གྲོང་ཁྱེར་གྱི་གྲོང་ཁྱེར་དོ་དམ་ཞབས་ཞུའི་ཐད་གཏོང་ཁ་པར་12319དངོས་སུ་ཤར་གཏོང་བྱས་པ་རེད། འགྲོ་ལམ་ཧམ་བཟུང་གིས་ཚོང་གཉེར་བྱེད་པ་དང་། ཚོང་ཁང་ཕྱི་རོལ་དུ་ཚོང་གཉེར་བྱེད་པ། མཚན་ཁྲོམ་གྱིས་དམངས་ལ་སུན་པོ་བཟོ་བ། ཁྲོམ་ལམ་རྒྱུད་ཀྱི་ཚོང་ཁང་མཛེས་བཟོ་བྱེད་པ། འགྲོ་ལམ་ཐོག་དངོས་རྫས་གང་བྱུང་དུ་འཇོག་པ། གང་བྱུང་དུ་འཛུགས་སྐྲུན་བྱེད་པ་སོགས་གྲོང་ཁྱེར་དོ་དམ་དང་འབྲེལ་བ་ཡོད་པའི་ལས་དོན་ཐད་བློ་འདྲི་དང་། གྲོས་འགོ། ཞུ་གཏུག་བཅས་བྱེད་དགོས་རིགས་གྲོང་མིས་གྲོང་ཁྱེར་དོ་དམ་ཞབས་ཞུའི་ཐད་གཏོང་ཁ་པར་12319 ལ་ཁ་པར་བཏང་ནས་གོང་ཞུ་བྱེད་ཆོག་གི་ཡོད།