ཉིན་ཤས་བསྟུད་མར། པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་འགྲན་བསྡུར་ཁག་ཚ་ཚ་འུར་འུར་ངང་བྱེད་བཞིན་ཡོད་པ་དང་། གཞིས་རྩེ་གྲོང་ཁྱེར་གཏིང་སྐྱེས་རྫོང་མཐའ་མཚམས་ཁུལ་གྱི་གྲོང་རྡལ་ཆུང་གྲས་འདྲེན་ཐང་གྲོང་རྡལ་གྱིས་ཀྱང་ཨོ་རྩལ་འགྲན་ཚོགས་དེར་དོ་ཁུར་ཆེན་པོ་བྱེད་བཞིན་ཡོད།

ཞོགས་པ་སྔ་པོར་འདྲེན་ཐང་གྲོང་རྡལ་གཙང་ཁ་གྲོང་ཚོའི་ལས་བྱེད་པ་ཚོས་གྲོང་མི་ཚོར་པེ་ཅིང་དགུན་དུས་ཨོ་རྩལ་འགྲན་ཚོགས་སྐོར་དྲིལ་བསྒྲགས་བྱེད་བཞིན་པ་དང་། ཚང་མས་འགོ་ཚུགས་མཛད་སྒོ་དང་རང་རྒྱལ་ལ་བྱ་དགའི་རྟགས་མ་ག་ཚོད་རགས་མིན། རང་ལྗོངས་ཀྱི་ལུས་རྩལ་པའི་འགྲན་བསྡུར་གྱི་གནས་ཚུལ་སོགས་གླེང་གི་ཡོད།

གཞིས་རྩེ་གྲོང་ཁྱེར་གཏིང་སྐྱེས་རྫོང་འདྲེན་ཐང་གྲོང་རྡལ་གཙང་ཁ་གྲོང་ཚོའི་ཧྲུའུ་ཅི་ཨང་དང་པོ་སྐལ་བཟང་ཚེ་རིང་ནས། མེས་རྒྱལ་ལྷོ་ནུབ་མཐའ་མཚམས་ཁུལ་དུ་གནས་པའི་ང་ཚོས་དགུན་དུས་ཨོ་རྩལ་འགྲན་ཚོགས་ཀྱི་གནས་ཚུལ་ལ་དོ་ཁུར་བྱེད་ཀྱི་ཡོད། རྒྱལ་ས་པེ་ཅིང་དུ་ཨོ་རྩལ་འགྲན་ཚོགས་སྐབས་གཉིས་གཉེར་བ་དེའི་ཐོག་ནས་ཀྲུང་གོའི་སྟོབས་ཤུགས་མངོན་ཡོད་པས་རང་ཉིད་ཀྲུང་གོ་བ་ཞིག་ཡིན་པའི་ངོས་ནས་སྤོབས་པ་ཆེན་པོ་སྐྱེས་ཀྱི་འདུག་ཅེས་གསུངས་པ་རེད།

གཞིས་རྩེ་གྲོང་ཁྱེར་གཏིང་སྐྱེས་རྫོང་འདྲེན་ཐང་གྲོང་རྡལ་གཙང་ཁ་གྲོང་ཚོའི་གྲོང་གསེབ་དར་རྒྱས་ཀྱི་ཆེད་བསྐོས་ལས་མི་ཟླ་བ་དོན་གྲུབ་ནས། སྤྱི་ལོ ༢༠༠༨ ལོར་ང་ཚོའི་གྲོང་ཚོར་གཞུང་ལམ་དང་གློག་མེད་པས་སྐབས་དེ་དུས་ཀྱི་ཨོ་རྩལ་འགྲན་ཚོགས་ལྟ་ཐུབ་མ་བྱུང་། ད་ཆ་བརྙན་འཕྲིན་དང་ལག་ཐོགས་ཁ་པར། གློག་ཀླད་ཀྱི་སྤྱོད་སྣེ་མང་པོ་སོགས་ཀྱི་ཐོག་ནས་ལྟ་ཐུབ་ཀྱི་ཡོད། ང་ཚོའི་ཕ་ཡུལ་ལ་འགྱུར་ལྡོག་ཆེན་པོ་འདི་འདྲ་བྱུང་བ་ནི་ང་ཚོའི་མེས་རྒྱལ་སྟོབས་ཆེར་སོང་བས་རེད། མེས་རྒྱལ་སྟོབས་འབྱོར་མངའ་ཐང་རྒྱས་པའི་སྨོན་འདུན་ཞུ་རྒྱུ་ཡིན་ཞེས་གསུངས་པ་རེད།།