སྤྱི་ཚེས ༦ ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོར་ཁམ་ཕུ་ཁྲེའི་རྒྱལ་ཡུམ་མོ་ཉི་ལེར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཛའ་གྲོགས་ཀྱི་བྱས་རྗེས་གཟེངས་རྟགས་གནང་བའི་མཛད་སྒོ་འཚོགས་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་རྒྱུན་ལས་ཨུ་ཡོན། ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི། ཏང་དང་རྒྱལ་ཁབ་ཀྱི་བྱས་རྗེས་དང་མཚན་སྙན་གཟེངས་བསྟོད་ལས་དོན་ཨུ་ཡོན་ལྷན་ཁང་གི་ཀྲུའུ་རེན་ཝང་ཧུའུ་ཉིང་མཛད་སྒོར་ཕེབས་ཡོད་པ་རེད།

གསེར་མདོག་གི་ཚོམས་ཆེན་ནང་ཁ་དོག་དམར་པོའི་རྒྱབ་ངོས་ཆེན་པོའི་ཐོག་ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་པོའི་རྒྱལ་དར་གྲལ་འགྲིག་པོས་བསྒྲིགས་ཡོད་པ་དང་རྒྱབ་ལྗོངས་པང་ལེབ་ཐོག་གསེར་མདོག་གི་མཛའ་གྲོགས་གཟེངས་རྟགས་རི་མོ་དེ་བས་མངོན་གསལ་དོད་པོ་ཡོད།

མཛད་སྒོ་འགོ་ཚུགས་སྐབས་ཀྲུང་གོ་མི་དམངས་བཅིངས་འགྲོལ་དམག་གཟབ་སྦྲེང་རུ་ཁག་གི་གུས་ལུགས་དམག་གིས་གོམ་སྟབས་ཆེན་པོས་ཚོགས་རར་བསྐྱོད་ཅིང་། བྱས་རྗེས་གཟེངས་རྟགས་གནང་སའི་སྟེགས་བུའི་ལོགས་གཉིས་སུ་རུ་སྟར་བསྒྲིགས་ཡོད།

རྔམ་བརྗིད་ལྡན་པའི་གུས་ལུགས་རོལ་དབྱངས་གྲགས་པ་དང་བསྟུན། གསེར་མདོག་གི་སྒོ་མོ་ག་ལེར་ཕྱེ་བ་དང་ཞི་ཅིན་ཕིང་དང་མོ་ཉི་ལེ་ཚོམས་ཆེན་དུ་ཕེབས་ཡོད། ཀྲུའུ་ཞི་ཞི་ཅིན་ཕིང་གི་སྐུ་ཟླ་ཕེང་ལི་ཡོན་དང་། ཁམ་ཕུ་ཁྲེའི་རྒྱལ་པོ་ཞི་ཧ་མོ་ཉི་མཉམ་དུ་ཕེབས་ཡོད། ཚོགས་ར་ཡོངས་ཀྱི་སྐུ་མགྲོན་རྣམས་ནས་ཡར་ལངས་ནས་སྤྲོ་སེམས་འཁོལ་པོས་དགའ་བསུ་ཞུས་ཡོད། ཞི་ཅིན་ཕིང་དང་མོ་ཉི་ལེ་རྣམ་གཉིས་བྱས་རྗེས་གཟེངས་རྟགས་སྤྲོད་པའི་སྟེགས་བུའི་ཐོག་ཕེབས་ཡོད་པ་རེད།

དམག་དཔུང་རོལ་ཆ་རུ་ཁག་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་དཀྲོལ་བ་རེད།

ཞི་ཅིན་ཕིང་གིས་གསུང་བཤད་གནང་བ་དང་། ཁོང་གིས། རྒྱལ་ཡུམ་མོ་ཉི་ལེ་ནི་ཀྲུང་གོ་དང་ཁམ་ཕུ་ཁྲེའི་མཛའ་མཐུན་གྱི་དཔང་པོ་དང་སྐུལ་འདེད་པ་གལ་ཆེན་ཞིག་ཡིན།

སྤྱི་ལོ ༡༩༥༨ ལོར། རྒྱལ་ཡུམ་མོ་ཉི་ལེས་རྒྱལ་པོ་ཞི་ཧ་ནུའུ་ཁེར་ཕེབས་རོགས་ཞུས་ཏེ་མཉམ་དུ་ཀྲུང་གོར་ཐེངས་དང་པོ་ཕེབས་པ་དང་། དེ་ནས་བཟུང་ཀྲུང་གོ་དང་ལས་དབང་དམ་པོར་འབྲེལ་ཡོད། ལོ་ངོ་ ༦༠ ལྷག་གི་རིང་། རྒྱལ་ཡུམ་མོ་ཉི་ལེ་ཀྲུང་གོ་དང་ཁམ་ཕུ་ཁྲེའི་མཛའ་གྲོགས་བྱ་གཞག་ནང་ཧུར་ཐག་ཞུགས་ནས་ཀྲུང་གོ་གསར་པའི་འཕེལ་རྒྱས་ལོ་རྒྱུས་ཀྱི་དཔང་པོ་གནང་ཡོད། རྒྱལ་ཡུམ་མོ་ཉི་ལེ་ཡིས་ཀྲུང་གོའི་མི་དམངས་ལ་དམིགས་བསལ་གྱི་བརྩེ་བ་བཅངས་གནང་བ་དང་། རྒྱལ་ཁབ་གཉིས་པོའི་ཁྱབ་ཁོངས་ཁག་གི་འགྲོ་འོང་དང་མཉམ་ལས་ལ་རྒྱབ་སྐྱོར་ཧུར་ཐག་བྱས་ཏེ་ཀྲུང་གོ་དང་ཁམ་ཕུ་ཁྲེའི་འབྲེལ་བ་གོང་འཕེལ་འགྲོ་རྒྱུར་སྐུལ་འདེད་དང་རྒྱལ་ཁབ་གཉིས་པོའི་མི་དམངས་ཀྱི་མཛའ་གྲོགས་ཟབ་ཏུ་གཏོང་ཆེད་ལེགས་སྐྱེས་གཟེངས་སུ་ཐོན་པ་ཕུལ་གནང་ཡོད་ཅེས་གསུངས་པ་རེད།

ཞི་ཅིན་ཕིང་གིས། ཀྲུང་གོ་དང་ཁམ་ཕུ་ཁྲེའི་དབར་ཕྱི་འབྲེལ་འབྲེལ་བ་བཙུགས་ནས་ལོ ༦༢ སོང་རིང་། ཕྱོགས་གཉིས་པོས་ཐོག་མཐའ་བར་གསུམ་དུ་ཕན་ཚུན་རྒྱབ་སྐྱོར་དང་ཕན་ཚུན་རོགས་རམ་བྱས་ཏེ་གཞོམ་ཞིག་མེད་པའི་མཛའ་གྲོགས་འབྲེལ་བ་བཙུགས་ཤིང་། འཐབ་ཇུས་ཀྱི་དོན་སྙིང་ལྡན་པའི་ལས་དབང་གཅིག་མཐུན་མ་ལག་ལ་གྱུར་ཡོད། རྒྱལ་ཁབ་གཉིས་པོའི་འབྲེལ་བས་ཚོད་བགམ་སྣ་ཚོགས་ཐེག་ཐུབ་ཡོད་པས་དེ་ནི་རྒྱལ་ཁབ་དང་རྒྱལ་ཁབ་དབར་འགྲོ་འོང་བྱེད་པའི་དཔེ་མཚོན་ཞིག་རེད་ཅེས་བརྗོད་ཀྱང་ཆོག ཁམ་ཕུ་ཁྲེའི་གོང་མ་ཚང་གིས་དེའི་ཐད་གཞན་གྱིས་ཚབ་བྱེད་ཐབས་བྲལ་བའི་ནུས་པ་གལ་ཆེན་འདོན་སྤེལ་བྱས་ཡོད། ཀྲུང་གོའི་ཕྱོགས་ནས་ཁམ་ཕུ་ཁྲེ་ཕྱོགས་དང་མཉམ་དུ་ཀྲུང་གོའི་འགོ་ཁྲིད་རྒན་རབས་པ་དང་རྒྱལ་པོ་ཞི་ཧ་ནུའུ་ཁེ། རྒྱལ་ཡུམ་མོ་ཉི་ལེ་བཅས་ཀྱིས་ཐུན་མོང་ཐོག་བཏོད་གནང་བའི་ཀྲུང་གོ་དང་ཁམ་ཕུ་ཁྲེའི་སྲོལ་རྒྱུན་མཛའ་གྲོགས་རྒྱུན་འཛིན་དང་དར་སྤེལ་བཏང་ནས་ལོ་རྒྱུས་ཀྱི་དུས་སྐབས་གསར་པའི་ནང་ཀྲུང་གོ་དང་ཁམ་ཕུ་ཁྲེའི་འབྲེལ་བར་སྐྱེ་སྟོབས་དང་གསོན་ཤུགས་གསར་པ་འཕེལ་བ་བྱས་པ་དང་། རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་སྔར་ལས་མང་པོ་བསྐྲུན་ཡོད་ཅེས་ནན་སྟོན་གནང་ཡོད།

ཞི་ཅིན་ཕིང་གིས། ལྗིད་ཏིག་ཏིག་གི་མཛའ་གྲོགས་བྱས་རྗེས་གཟེངས་རྟགས་འདིས་ཀྲུང་གོ་མི་དམངས་ནས་རྒྱལ་ཡུམ་མོ་ཉི་ལེར་གུས་བཀུར་ཞུ་བའི་སེམས་པ་དང་ཁམ་ཕུ་ཁྲེའི་མི་དམངས་ལ་བཅངས་པའི་བརྩེ་བ་ཟབ་མོ་མཚོན་ཡོད་ལ། ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་པོའི་མཚོ་ལྟར་ཟབ་པའི་མཛའ་མཐུན་གྱི་བརྩེ་བ་ཡང་མཚོན་ཡོད། ཀྲུང་གོ་དང་ཁམ་བུ་ཀྲེ་རྒྱལ་ཁབ་གཉིས་པོ་དར་རྒྱས་གོང་འཕེལ་དང་མི་དམངས་བདེ་སྐྱིད་ཡོང་བ། རྒྱལ་ཁབ་གཉིས་པོའི་མི་དམངས་ཡུན་རིང་མཛའ་མཐུན་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས་པ་རེད།

དེ་རྗེས་ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་ཨུ་ཡོན། ཀྲུང་དབྱང་ཕྱི་ཕྱོགས་ལས་དོན་ཨུ་ཡོན་ལྷན་ཁང་གི་གཞུང་དོན་ཁང་གི་ཀྲུའུ་རེན། ཏང་དང་རྒྱལ་ཁབ་ཀྱི་བྱས་རྗེས་དང་མཚན་སྙན་གཟེངས་བསྟོད་ལས་དོན་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་དབྱང་ཅེ་ཁྲེ་ཡིས་རྒྱལ་ཁབ་ཀྱི་ཀྲུའུ་ཞིའི་བྱས་རྗེས་གཟེངས་རྟགས་སྤྲོད་པའི་བཀའ་རྒྱ་སྒྲོག་སྦྱང་གནང་བ་རེད།

གུས་ལུགས་དམག་གིས་མཛའ་གྲོགས་ཀྱི་བྱས་རྗེས་གཟེངས་རྟགས་ཚོགས་རར་སྲུང་སྐྱེལ་ཞུས་ཡོད།

ཞི་ཅིན་ཕིང་གིས་མོ་ཉི་ལེར་བྱས་རྗེས་གཟེངས་རྟགས་གནང་བ་དང་། ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་གྲགས་པ་རེད།

དམག་དཔུང་རོལ་ཆ་རུ་ཁག་གིས་ཁམ་ཕུ་ཁྲེའི་རྒྱལ་གླུ་དཀྲོལ་བ་རེད།

མོ་ཉི་ལེས། དེ་རིང་། ཀྲུའུ་ཞི་ཞི་ཅིན་ཕིང་སྐུ་ངོ་མས་ང་རང་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཛའ་གྲོགས་བྱས་རྗེས་གཟེངས་རྟགས་གནང་བ་དེས་རླབས་ཆེན་གྱི་ཀྲུང་གོ་དང་ཀྲུང་གོའི་མི་དམངས་ཀྱིས་རང་ཉིད་དང་དེ་བཞིན་ཁམ་ཕུ་ཁྲེའི་མི་དམངས་ལ་བཅངས་པའི་མཛའ་གྲོགས་དང་སྤུན་ཟླ་ལྟ་བུའི་བརྩེ་བ་གང་ལེགས་མཚོན་ཡོད། ང་རང་ཧ་ཅང་དགའ་པོ་བྱུང་བས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། རྒྱལ་པོ་ཞི་ཧ་ནུའུ་ཁེ་དང་ཀྲུང་གོའི་འགོ་ཁྲིད་རྒན་རབས་པས་ཐུན་མོང་ཐོག་བཏོད་གནང་བ་མ་ཟད་ད་བར་རྒྱུན་ཡག་པོ་བསྐྱངས་པའི་ཁམ་བུ་ཁྲེ་དང་ཀྲུང་གོའི་སྲོལ་རྒྱུན་མཛའ་གྲོགས་ང་ཚོས་ནམ་ཡང་ཡིད་ལ་བརྟན་པོར་ངེས་རྒྱུ་ཡིན། དུས་ཡུན་རིང་པོའི་ནང་། ཀྲུང་གོས་ཁམ་ཕུ་ཁྲེའི་དྲང་བདེན་བྱ་གཞག་ལ་བློ་བརྟན་འགྱུར་མེད་ངང་རྒྱབ་སྐྱོར་བྱས་པ་དང་ཁམ་ཕུ་ཁྲེའི་རྒྱལ་ཁབ་ཀྱི་རང་བདག་རང་བཙན་དང་། མངའ་ཁོངས་ས་ཆ་ཆ་ཚང་། རྒྱལ་ཁབ་ཞི་བདེ། མི་རིགས་མཐུན་སྒྲིལ་དང་དེ་བཞིན་བྱ་གཞག་ཁག་འཕེལ་རྒྱས་འགྲོ་རྒྱུར་རྒྱབ་སྐྱོར་གནང་ཡོད། ང་རང་ནས་རླབས་ཆེན་གྱི་ཀྲུང་གོའི་གུང་ཁྲན་ཏང་དང་། ཀྲུང་གོའི་སྲིད་གཞུང་། ཀྲུང་གོའི་མི་དམངས་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཁམ་ཕུ་ཁྲེའི་མི་དམངས་ཀྱིས་སྤུན་ཟླ་ལྟ་བུའི་ཀྲུང་གོའི་མི་དམངས་དང་མཉམ་དུ་སྲོལ་རྒྱུན་གྱི་མཛའ་མཐུན་སྲ་བརྟན་དང་། མཐུན་སྒྲིལ་མཉམ་ལས་ལ་ཤུགས་སྣོན་བརྒྱབ་ནས་ཁམ་ཕུ་ཁྲེ་དང་ཀྲུང་གོའི་འབྲེལ་བ་རྒྱུན་ཆད་མེད་པར་མདུན་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་ཡིན། ཀྲུང་གོ་གུང་ཁྲན་ཏང་དང་ཀྲུང་གོ་མི་དམངས་ལ་ཀྲུའུ་ཞི་ཞི་ཅིན་ཕིང་གི་འགོ་ཁྲིད་འོག་རྒྱུན་ཆད་མེད་པར་གྲུབ་འབྲས་གསར་པ་དེ་བས་ཆེ་བ་ཐོབ་རྒྱུའི་སྨོན་འདུན་ཞུ་རྒྱུ་ཡིན། ཁམ་ཕུ་ཁྲེ་དང་ཀྲུང་གོའི་མཛའ་གྲོགས་ཡུན་རིང་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས་པ་རེད།

བྱས་རྗེས་གཟེངས་རྟགས་སྤྲོད་པའི་མཛད་སྒོར་ཞུགས་མཁན་གྲས་སུ་ད་དུང་ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་ཨུ་ཡོན། ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི། ཀྲུང་དབྱང་གཞུང་ལས་ཐིང་གི་ཀྲུའུ་རེན་ཏིང་ཞུའེ་ཞང་དང་། ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་ཨུ་ཡོན། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཝང་ཁྲེན། རྒྱལ་དོན་ཨུ་ཡོན་དང་ཕྱི་འབྲེལ་པུའི་པུའུ་ཀྲང་གཅིག་ལྕོགས་ཝང་དབྱི། རྒྱལ་དོན་ཨུ་ཡོན་དང་རྒྱལ་སྲིད་སྤྱི་ཁྱབ་ཁང་གི་དྲུང་ཡིག་ཆེན་མོ་གཅིག་ལྕོགས་ཞའོ་ཅེ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཀྲང་ཆིང་ལི་དང་། ཀྲུང་དབྱང་དམག་ཨུད་ཀྱི་ཨུ་ཡོན། ཀྲུང་དབྱང་དམག་ཨུད་ཀྱི་ཆབ་སྲིད་ལས་དོན་པུའི་ཀྲུའུ་རེན་མེའོ་ཧྭ་སོགས་ཡོད། ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་པོའི་ལས་རིགས་ཁག་གི་མཛའ་གྲོགས་མི་སྣའི་འཐུས་མི་ཡང་མཛད་སྒོར་ཞུགས་ཡོད། །