ཉེ་ཆར།  རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྗོངས་ཡོངས་ཀྱི་ལས་ཞུགས་ལས་གཏོད་ལས་དོན་ལ་མཆན་བཀོད་མཛུབ་སྟོན་གནང་བ་རེད།

ཝང་ཅུན་ཀྲེང་གིས་མཆན་བཀོད་མཛུབ་སྟོན་ནང་བསྟན་དོན།  ༢༠༢༡ ལོར་ལྗོངས་ཡོངས་ཀྱི་ལས་ཞུགས་ལས་གཏོད་ཁོངས་གཏོགས་ཀྱིས་ལས་ཞུགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ་ལས་ཞུགས་བརྟན་པོ་དང་།  ལས་ཞུགས་འགན་ལེན།  ལས་གཏོད་ལ་སྐུལ་འདེད་བཅས་གཏོང་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་དང་དམངས་འཚོའི་འདུ་འགོད་ཨང་དང་པོར་བརྩིས་ནས་དམ་འཛིན་བྱས་ལ།  ནུས་ཤུགས་ཆེ་བ་དང་།  ཚད་བརྒལ་རང་བཞིན།  སྡེབ་སྒྲིག་རྣམ་པ་བཅས་ཀྱི་སྲིད་ཇུས་བྱ་ཐབས་ལ་བརྟེན་ནས་ལས་ཞུགས་ཀྱི་དུས་བབ་བརྟན་པོ་ཡོང་བ་བྱས་ཏེ།  རང་ལྗོངས་ཀྱི་ལས་ཞུགས་ལས་གཏོད་ལས་དོན་ལ་སྐུལ་འདེད་བཏང་བར་ཕན་འབྲས་མངོན་གསལ་དོད་པོ་ཐོན་ཡོད།

ཝང་ཅུན་ཀྲེང་གིས་ནན་བཤད་གནང་དོན།  ལས་ཞུགས་ནི་དམངས་འཚོའི་རྩ་བ་ཡིན།  སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལས་ཞུགས་ནི་དམངས་འཚོའི་འདུ་འགོད་ཆེ་ཤོས་དང་།  དམངས་སེམས་ཀྱི་འདུ་འགོད་ཆེ་ཤོས།  རྨང་གཞིའི་འདུ་འགོད་ཆེ་ཤོས་བཅས་ཡིན་ལ།  སྤྱི་ཚོགས་བརྟན་ལྷིང་ཡོང་བའི་འགན་སྲུང་གལ་ཆེན་ཡང་ཡིན་པས།ངེས་པར་དུ་དམ་འཛིན་ཏན་ཏིག་དང་དམ་འཛིན་ཡག་པོ་བྱེད་དགོས།རིམ་པ་ཁག་དང་སྡེ་ཚན་ཁག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ནས་ལས་ཞུགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་།  ལས་ཞུགས་ལས་གཏོད་ལས་དོན་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱེད་པ།  ལས་ཞུགས་སྔོན་ལ་འཇོག་པའི་སྲིད་ཇུས་ལག་བསྟར་ཧུར་ཐག་བྱེད་པ།  ཐབས་བརྒྱ་ཇུས་སྟོང་གིས་ལས་ཞུགས་ཐབས་ལམ་རྒྱ་ཆེར་གཏོང་བ།  ལས་ཞུགས་ཀྱི་ལྟ་བ་འགྱུར་ལྡོག་གཏོང་བར་སློབ་གསོ་ཁྲིད་སྟོན་བྱེད་པ།  སྤུས་ཚད་དེ་བས་ལེགས་པ་དང་ཁྱབ་རྒྱ་དེ་བས་ཆེ་བའི་ལས་ཞུགས་ཀྱི་ཞབས་ཞུ་སྒྲུབ་པ།  ཆ་རྐྱེན་དེ་བས་ལེགས་པའི་ལས་ཞུགས་ཀྱི་ཁོར་ཡུག་གཏོད་པ།  སྤུས་ཚད་དེ་བས་ལེགས་པ་དང་དེ་བས་ཡག་པའི་སྒོ་ནས་ལས་ཞུགས་ཐུབ་པ་བཅས་བྱས་ཏེ།  དུས་རབས་གསར་པའི་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ལེགས་སྐྱེས་འབུལ་བ་དང་ཕུལ་དུ་བྱུང་བའི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས།།