ཟླ ༨ ཚེས ༢༢ ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ལྟར། ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་སྨོན་འདུན་བཟང་པོ་བསྣམས་ནས། ཀྲུང་དབྱང་སྐུ་ཚབ་ཚོགས་པའི་ཁོངས་མི་ཁག་གཅིག་གིས་གཞིས་རྩེར་མི་རིགས་ཁག་གི་ལས་བྱེད་པ་དང་མང་ཚོགས་ལ་འཚམས་འདྲི་གནང་ཞིང་། འདི་ནི་ཝང་ཧུའུ་ཉིང་དང་ཀྲུང་དབྱང་སྐུ་ཚབ་ཚོགས་པའི་ཁོངས་མི་ཁག་གཅིག་དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོར་ཕེབས་ནས་ས་ཡོམ་གྱི་གེགས་རྗེས་སླར་གསོ་བསྐྱར་སྐྲུན་དང་གནོད་འཚེ་ཕོག་པའི་མང་ཚོགས་གནས་སྤོའི་སྐོར་ལ་རྟོག་ཞིབ་དང་སྦྲགས། མང་ཚོགས་ལ་གཟིགས་པར་ཕེབས་པ།

ཟླ ༨ ཚེས ༢༢ ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ལྟར། ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་སྨོན་འདུན་བཟང་པོ་བསྣམས་ནས། ཀྲུང་དབྱང་སྐུ་ཚབ་ཚོགས་པའི་ཁོངས་མི་ཁག་གཅིག་གིས་གཞིས་རྩེར་མི་རིགས་ཁག་གི་ལས་བྱེད་པ་དང་མང་ཚོགས་ལ་འཚམས་འདྲི་གནང་ཞིང་། འདི་ནི་ཝང་ཧུའུ་ཉིང་དང་ཀྲུང་དབྱང་སྐུ་ཚབ་ཚོགས་པའི་ཁོངས་མི་ཁག་གཅིག་པ་སྣམ་རྫོང་དགའ་སྡོང་གྲོང་རྡལ་ཨ་ཡ་གྲོང་ཚོར་ཕེབས་ནས་གྲོང་གསེབ་དར་རྒྱས་ཀྱི་ལས་དོན་ལ་རྟོག་ཞིབ་དང་མང་ཚོགས་ཀྱི་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་གནང་བཞིན་པ།

ཤིན་ཧྭ་གསར་འགྱུར་ཁང་ལྷ་ས་ནས་ཟླ ༨ ཚེས ༢༢ ཉིན་གློག་འཕྲིན་འབྱོར་གསལ།　སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ལྟར། ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་སྨོན་འདུན་བཟང་པོ་བསྣམས་ནས། ཚེས ༢༢ ཉིན་ཀྲུང་དབྱང་སྐུ་ཚབ་ཚོགས་པའི་ཚོགས་པ་གཙོ་བོ་དང་ཡན་ལག་ཚོགས་པ་ཁག་གཞིས་རྩེ་དང་། མངའ་རིས། ཆབ་མདོ། ནག་ཆུ། ཉིང་ཁྲི། ལྷོ་ཁ་བཅས་སུ་ཕེབས་ཏེ་ས་གནས་དེ་གའི་མི་རིགས་ཁག་གི་ལས་བྱེད་པ་དང་མང་ཚོགས་ལ་འཚམས་འདྲི་གནང་ཞིང་།　སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་སྙན་སེང་གསན་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་བྱས་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རིང་དོན་འཁྱོལ་ཇི་མ་ཇི་བཞིན་བྱེད་དགོས་པའི་ནན་བཤད་གནང་བ་རེད། ཡན་ལག་ཚོགས་པ་ཁག་གིས་ས་གནས་དེ་གར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཕྱག་བྲིས་ཕྱག་བསྟར་མ་ཀྲུང་ཧྭ་མི་རིགས་གཅིག་མཐུན་ཚོགས་པ་མཉམ་དུ་བཏོད་ནས་མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་དགོས་ཞེས་པའི་རྟེན་འབྲེལ་སྒོ་བན་བསྩལ་བ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་དང་། རྒྱལ་ཡོངས་སྲིད་གྲོས་ཀྱི་ཀྲུའུ་ཞི། ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་བཅས་ཡིན་པའི་ཝང་ཧུའུ་ཉིང་གིས་སྐུ་ཚབ་ཚོགས་པ་གཙོ་བོའི་སྣེ་ཁྲིད་དེ་དིང་རི་རྫོང་དུ་ཕེབས་ནས། ས་ཡོམ་གྱི་གེགས་རྗེས་བསྐྱར་སྐྲུན་དང་གནོད་འཚེ་ཕོག་པའི་མང་ཚོགས་གནས་སྤོའི་སྐོར་ལ་རྟོག་ཞིབ་གནང་བ་མ་ཟད། གྲམ་མཚོ་ཤང་ཟིང་དཀར་གྲོང་ཚོའི་གནོད་འཚེ་ཕོག་པའི་མང་ཚོགས་ལ་འཚམས་འདྲི་གནང་ཞིང་།

ཁོང་གིས་ཏང་ཀྲུང་དབྱང་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དིང་རིའི་ཡོམ་འགོག་གེགས་སེལ་དང་། གེགས་རྗེས་བསྐྱར་སྐྲུན། གནོད་འཚེ་ཕོག་པའི་མང་ཚོགས་ཀྱི་ཐོན་སྐྱེད་དང་འཚོ་བ་བཅས་ལ་ཐུགས་ཁུར་ཟབ་བཞེས་གནང་གི་ཡོད་པས། ཁྱིམ་གཞིས་བསྐྱར་སྐྲུན་གྱི་ལས་དོན་ཞིབ་ཕྲ་དང་ཏན་ཏིག་སྒྲུབ་པ་དང་གནོད་འཚེའི་རྐྱེན་གྱིས་དབུལ་ལོག་མི་ཡོང་བའི་སྔོན་འགོག་བྱས་ཏེ་བདེ་སྐྱིད་དང་མཛེས་སྡུག་ལྡན་པའི་ཁྱིམ་གཞིས་གསར་པ་འཛུགས་སྐྲུན་ཧུར་ཐག་བྱེད་དགོས་ཞེས་གསུངས་ཤིང་། སྐུ་ཚབ་ཚོགས་པ་གཙོ་བོ་པ་སྣམ་རྫོང་དགའ་སྡོང་གྲོང་རྡལ་ཨ་ཡ་གྲོང་ཚོར་ཕེབས་ནས་གཞི་རིམ་ཏང་འཛུགས་སྐྱོང་དང་། གྲོང་གསེབ་དར་རྒྱས། གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་བཅས་ལ་རྟོག་ཞིབ་གནང་སྟེ་མང་ཚོགས་ཀྱི་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་གནང་བ་རེད། ཝང་ཧུའུ་ཉིང་གིས་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་འདོན་སྤེལ་གང་ལེགས་བྱས་ཏེ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བ། མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཟབ་ཏུ་བཏང་ནས། མི་རིགས་ཁག་གི་མི་དམངས་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་སྐྱེལ་རྒྱུ་ཡོང་བ་བྱེད་དགོས་ཞེས་གསུངས་པ་རེད། སྐུ་ཚབ་ཚོགས་པ་གཙོ་བོ་གཞིས་རྩེ་རྒྱལ་སྤྱིའི་སྐམ་སའི་གྲུ་ཁའི་ཕྱིར་གཏོང་དངོས་ཟོག་ཞིབ་བཤེར་བྱ་ཡུལ་དུ་རྟོག་ཞིབ་གནང་བར་ཕེབས་ཤིང་། ཝང་ཧུའུ་ཉིང་གིས་སྒྱུར་བཅོས་སྒོ་དབྱེ་སྔར་བས་གཏིང་ཟབ་ཏུ་གཏོང་བ་དང་། བོད་ཀྱིས་ནང་ཁུལ་དང་ཕྱི་ཕྱོགས་སུ་སྒོ་མོ་འབྱེད་པའི་ཆུ་ཚད་མཐོ་རུ་གཏོང་བ། ས་ཁོངས་ཀྱི་འཐབ་ཇུས་གལ་ཆེན་ལ་རང་འགུལ་ངང་ཞབས་འདེགས་ཞུ་བ་དང་འབྲེལ་མཐུད་བྱས་ནས་བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་ཞེས་གསུངས་པ་རེད། སྐུ་ཚབ་ཚོགས་པ་གཙོ་བོ་གཞིས་རྩེ་ལྕང་གསར་རྒྱལ་ཁབ་འདམ་རའི་སྤྱི་གླིང་དུ་རྟོག་ཞིབ་གནང་བར་ཕེབས་ཤིང་། ཝང་ཧུའུ་ཉིང་གིས། མཚོ་བོད་ས་མཐོའི་སྐྱེ་ཁམས་ཁོར་ཡུག་སྲུང་སྐྱོང་ལ་ཤུགས་སྣོན་རྒྱག་པ་དང་། རྒྱལ་ཁབ་སྤྱི་གླིང་གཙོ་བོར་བྱས་པའི་རང་བྱུང་སྲུང་སྐྱོང་ས་ཆའི་མ་ལག་འཛུགས་སྐྲུན་ལ་སྐུལ་འདེད་གཏོང་བ། ས་ཁོངས་ཀྱི་སྐྱེ་ཁམས་མ་ལག་ནུས་པ་རྒྱུན་ཆད་མེད་པར་ཆེ་རུ་འགྲོ་བར་སྐུལ་འདེད་གཏོང་བ་བཅས་བྱས་ནས། གངས་ལྗོངས་ས་མཐོའི་ནམ་མཁའ་དེ་བས་གཡའ་དག་པ་དང་། ས་གཞི་དེ་བས་རྡུལ་དག་པ། ཆུ་མོ་དེ་བས་དྭངས་ཤིང་གཙང་བ། ཁོར་ཡུག་དེ་བས་མཛེས་པ་བཅས་ཡོང་བར་བྱེད་དགོས་ཞེས་གསུངས་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་། ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་། ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་ལི་ཀན་ཅེ་ཡིས་མངའ་རིས་ཡན་ལག་སྐུ་ཚབ་ཚོགས་པའི་སྣེ་ཁྲིད་དེ་མངའ་རིས་ས་ཁུལ་སྒར་རྫོང་བཀྲ་ཤིས་སྒང་ཤང་བདེ་མཆོག་གྲོང་ཚོ་ཨུ་ལྷན་དུ་ཕེབས་ནས་མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་བྱ་སྤྱོད་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ལས་དོན་སྤེལ་ཚུལ་སོགས་ལ་མཁྱེན་རྟོགས་གནང་བ་རེད། མངའ་རིས་ས་ཨུད་ཀྱི་སྒོ་རའི་ནང་ལི་ཀན་ཅེ་དང་བཅས་པས་མངའ་རིས་ས་ཁུལ་གྱི་འགོ་ཁྲིད་ཚན་ཁག་གི་ཁོངས་མི་དང་དེ་བཞིན་མི་རིགས་ཁག་དང་ལས་རིགས་ཁག་གི་འཐུས་མིར་འཚམས་འདྲི་གནང་ནས་ལྷན་བཞུགས་སྐུ་པར་བསྐྱོན་པ་རེད། དེ་རྗེས་སྐུ་ཚབ་ཚོགས་པ་སྡེ་ཁུལ་དང་། སློབ་གྲྭ ཐོན་ལས་གླིང་། སྨན་ཁང་བཅས་སུ་ཕེབས་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་། གཞི་རིམ་བཅོས་སྐྱོང་། སློབ་གསོའི་བོད་སྐྱོར། ཞིང་ལས་འཕེལ་རྒྱས། སྨན་བཅོས་འཕྲོད་བསྟེན་བྱ་གཞག་སོགས་ཀྱི་གནས་ཚུལ་ལ་མཁྱེན་རྟོགས་གནང་བ་རེད། ལི་ཀན་ཅེ་ཡིས། མཐའ་དར་དམངས་ཕྱུག་དང་མཐའ་མཚམས་བརྟན་ལྷིང་ལ་སྐུལ་འདེད་གཏིང་ཟབ་གཏོང་བ་དང་། མི་རིགས་ཁག་གི་ལས་བྱེད་པ་དང་མང་ཚོགས་ཀྱི་མོས་སེམས་ལྔ་རྒྱུན་ཆད་མེད་པར་ཆེ་རུ་འགྲོ་བར་ཁྲིད་སྟོན་བྱེད་པ། མི་རིགས་ཁག་དབར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་བཅས་བྱས་ཏེ། ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་གཏོང་བ་དང་། ས་མཐོའི་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་གཏོང་བ། སྐྱེ་ཁམས་ཤེས་དཔལ་འཛུགས་སྐྱོང་ལ་ཤུགས་སྣོན་རྒྱག་པ། དུས་རབས་གསར་པའི་ཁ་གཏད་བོད་སྐྱོར་ལས་དོན་ཡག་པོ་སྒྲུབ་པ་སོགས་དོན་འཁྱོལ་ཏན་ཏིག་དང་ཞིབ་ཚགས་བྱས་ཏེ་མི་རིགས་ཁག་གི་མི་དམངས་ཀྱིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་གྲུབ་འབྲས་མཉམ་སྤྱོད་ཐུབ་པ་བྱེད་དགོས་ཞེས་གསུངས་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ། ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་ཀྲང་གོ་ཆིང་གིས་ཆབ་མདོ་ཡན་ལག་སྐུ་ཚབ་ཚོགས་པའི་སྣེ་ཁྲིད་དེ་ཐོག་མར་ཆབ་མདོ་གྲངས་རིག་སྐྱེ་ཁམས་ཐོན་ལས་གླིང་གི་བཀྲ་ཤིས་ཐང་ཆེན་དུ་ཕེབས་ནས་དམར་མདངས་ཆབ་མདོ། དར་རྒྱས་ཡར་བརྩོན་གྱི་མང་ཚོགས་ཀྱི་རྩལ་ནུས་འགྲེམས་སྟོན་བྱེད་སྒོར་བརྟག་ཞིབ་གནང་བ་རེད། དེ་རྗེས་སྐུ་ཚབ་ཚོགས་པ་དཀྱིལ་ཐང་སྡེ་ཁུལ་དུ་ཕེབས་ནས་གཞི་རིམ་ཏང་རྩ་འཛུགས་འཛུགས་སྐྱོང་བྱས་ཚུལ་ལ་རྟོག་ཞིབ་གནང་སྟེ་ཏང་ཡོན་རྒན་གྲས་ལ་འཚམས་འདྲི་གནང་བ་རེད། ཕྱི་དྲོར། ཀྲང་གོ་ཆིང་དང་བཅས་པས་ཆབ་མདོ་ཁུལ་གསར་ཤར་ཕྱོགས་གློག་ཤུགས་ས་བབ་མཐོ་བའི་རླུང་གློག་ཐོན་ལས་རྟེན་གཞིར་ནུས་རྒྱུ་གཙང་མའི་ཐོན་ལས་འཕེལ་རྒྱས་འགྲོ་ཚུལ་ལ་བརྟག་ཞིབ་གནང་བ་རེད། བྱམས་པ་གླིང་དགོན་པར་ཀྲང་གོ་ཆིང་གིས་དགོན་སྡེ་དོ་དམ་དང་རིག་དངོས་སྲུང་སྐྱོབ་གནས་ཚུལ་ལ་མཁྱེན་རྟོགས་ཞིབ་ཕྲ་གནང་ནས་བྱམས་པ་གླིང་དགོན་པར་རྟེན་འབྲེལ་གོས་དར་བསྩལ་བ་རེད། དེ་རྗེས་སྐུ་ཚབ་ཚོགས་པས་ཆབ་མདོ་གྲོང་ཁྱེར་གྱི་འགོ་ཁྲིད་ཚན་ཁག་གི་ཁོངས་མི་དང་དེ་བཞིན་མི་རིགས་ཁག་དང་ལས་རིགས་ཁག་གི་འཐུས་མིར་འཚམས་འདྲི་གནང་བ་དང་སྦྲགས་ལྷན་བཞུགས་སྐུ་པར་ཡང་བསྐྱོན་པ་རེད།

ཀྲང་གོ་ཆིང་གིས། ཆབ་མདོའི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྔར་བས་བརྟན་པོ་འཛུགས་པ་དང་། ས་བབ་ཀྱི་ལེགས་ཆ་དང་ཐོན་ཁུངས་ཀྱི་ལེགས་ཆ་གང་ལེགས་བཏོན་ཏེ་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ཀྱི་དོན་ཆེན་བཞིར་དམ་འཛིན་ཡག་པོ་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་ཆབ་མདོའི་ལག་ལེན་ལ་སྐུལ་འདེད་ཧུར་ཐག་གཏོང་དགོས་ཞེས་གསུངས་པ་རེད།

རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་དང་ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་བློ་བཟང་རྒྱལ་མཚན་གྱིས་ནག་ཆུ་ཡན་ལག་སྐུ་ཚབ་ཚོགས་པའི་སྣེ་ཁྲིད་དེ་དང་ཐོག་ནག་ཆུ་གྲོང་ཁྱེར་གསེར་རྙེད་ཆུས་ཧང་ཅཱ་གྲོང་གསར་དུ་ཕེབས་ནས་ཁྲི་སྟོང་ལས་གཞིའི་གནས་འཕྲོད་ལས་འཚམ་དང་མཛེས་མཐུན་གྱི་གྲོང་གསེབ་འཛུགས་སྐྲུན་བྱས་ཚུལ་ལ་བརྟག་ཞིབ་གནང་ནས་འབྲོག་པ་ཚོར་གཟིགས་པ་རེད། ཕྱི་དྲོར་སྐུ་ཚབ་ཚོགས་པ་ནུས་རྒྱུ་གཙང་མའི་ཐོན་ལས་གླིང་དང་སྨན་ཁང་དུ་ཕེབས་ནས་འཕེལ་རྒྱས་ཀྱི་གནས་ཚུལ་མཁྱེན་རྟོགས་གནང་བ་དང་། ཞབས་བརྟན་དགོན་པར་ཕེབས་ནས་འདུ་ཤེས་གསུམ་གྱི་སློབ་གསོ་དང་། དགོན་སྡེ་དོ་དམ་ལ་ཤུགས་སྣོན་དང་གསར་གཏོད་བྱེད་པ་དང་དེ་བཞིན་རིག་དངོས་སྲུང་སྐྱོང་སོགས་ཀྱི་ལས་དོན་སྤེལ་ཚུལ་ལ་བརྟག་ཞིབ་གནང་ནས་རྟེན་འབྲེལ་གོས་དར་བསྩལ་བ། ནག་ཆུ་གྲོང་ཁྱེར་སློབ་ཆུང་དུ་ཕེབས་ནས་སློབ་གསོ་དང་སློབ་ཁྲིད་གནས་ཚུལ་མཁྱེན་རྟོགས་གནང་བ་རེད། དེ་རྗེས་བློ་བཟང་རྒྱལ་མཚན་དང་བཅས་པ་ནག་ཆུ་གྲོང་ཁྱེར་གྱི་ཏང་སྲིད་ཚོགས་འདུ་ལྟེ་གནས་སུ་ཕེབས་ནས་ནག་ཆུ་གྲོང་ཁྱེར་གྱི་འགོ་ཁྲིད་ཚན་ཁག་གི་ཁོངས་མི་དང་དེ་བཞིན་མི་རིགས་ཁག་དང་ལས་རིགས་ཁག་གི་འཐུས་མིར་འཚམས་འདྲི་གནང་ནས་ལྷན་བཞུགས་སྐུ་པར་བསྐྱོན་པ་རེད། བློ་བཟང་རྒྱལ་མཚན་གྱིས། ནག་ཆུའི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྔར་བས་བརྟན་པོ་འཛུགས་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་དགོས། ཐོག་མཐའ་བར་གསུམ་དུ་དོན་དངོས་ལ་གཞིགས་པ་དང་ཡུལ་བབ་དང་བསྟུན་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། ཐོག་མཐའ་བར་གསུམ་དུ་ཏང་གི་འགོ་ཁྲིད་མཐའ་འཁྱོངས་དང་ཏང་འཛུགས་སྐྱོང་ལ་ཤུགས་སྣོན་ཏན་ཏིག་བརྒྱབ་ནས། ཀྲུང་གོའི་ལུགས་ཀྱི་དེང་རབས་ཅན་གྱི་ནག་ཆུའི་ལག་ལེན་ལ་སྐུལ་འདེད་ཧུར་ཐག་གཏོང་དགོས་ཞེས་གསུངས་པ་རེད།

རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་ཧུའུ་ཁྲུན་ཧྭ་ཡིས་ཉིང་ཁྲི་ཡན་ལག་སྐུ་ཚབ་ཚོགས་པའི་སྣེ་ཁྲིད་དེ་སྨན་གླིང་ཆུ་མཛོད་ཀྱི་ཆུ་རགས་ཁུལ་དུ་ཕེབས་ནས་ཡར་ཀླུང་གཙང་པོའི་སྨད་རྒྱུད་ཀྱི་ཆུ་གློག་ལས་གྲྭའི་འཆར་འགོད་ཇུས་འགོད་དང་འཛུགས་སྐྲུན་གནས་ཚུལ་མཁྱེན་རྟོགས་དང་འཐབ་ཕྱོགས་དང་པོའི་བཟོ་པར་འཚམས་འདྲི་གནང་བ་རེད། དེ་རྗེས་སྐུ་ཚབ་ཚོགས་པ་ཉིང་ཁྲི་གྲོང་རྡལ་ཀླུ་སྟེང་གྲོང་ཚོར་ཕེབས་ནས་གྲོང་གསེབ་དར་རྒྱས་ཀྱི་གནས་ཚུལ་མཁྱེན་རྟོགས་གནང་བ་དང་གྲོང་མི་ཚེ་རིང་ནོར་བུའི་ཁྱིམ་དུ་འཚམས་འདྲི་གནང་བ་དང་། ཁྲོན་བོད་ལྕགས་ལམ་གསེར་སྐྱེམས་ལའི་ཕུག་ལམ་ཁར་རྒྱལ་ཁབ་ཀྱི་རྣམ་གྲངས་གལ་ཆེན་འཛུགས་སྐྲུན་བྱས་ཚུལ་ལ་གཟིགས་ཞིབ་གནང་བ། གྲོང་ཁྱེར་སྲིད་དོན་ཞབས་ཞུའི་ལྟེ་གནས་སུ་ཞབས་ཞུའི་ཕྱོགས་བསྡུས་སྐར་ཁུང་སྒྱུར་བཅོས་ཀྱི་ཉམས་མྱོང་དང་བྱེད་སྟངས་མཁྱེན་རྟོགས་གནང་བ་དང་། གྲོང་ཁྱེར་ཏང་སྲིད་ཚོགས་འདུའི་ལྟེ་གནས་སུ་ཉིང་ཁྲི་གྲོང་ཁྱེར་གྱི་འགོ་ཁྲིད་ཚན་ཁག་གི་ཁོངས་མི་དང་དེ་བཞིན་མི་རིགས་ཁག་དང་ལས་རིགས་ཁག་གི་འཐུས་མིར་འཚམས་འདྲི་གནང་བ་དང་འབྲེལ་ལྷན་བཞུགས་སྐུ་པར་ཡང་བསྐྱོན་པ། ཀོང་པོ་སྤྱི་གླིང་དུ་ཕེབས་ནས་སྤྱི་གླིང་འཛུགས་སྐྲུན་གནས་ཚུལ་ལ་བརྟག་ཞིབ་གནང་བ་རེད། ཧུའུ་ཁྲུན་ཧྭ་ཡིས། ཉིང་ཁྲིའི་དཔལ་འབྱོར་དང་སྤྱི་ཚོགས་བྱ་གཞག་ལ་ཡར་རྒྱས་ཆེན་པོ་བྱུང་ནས་སྤྱི་ཚོགས་ཁྱོན་ཡོངས་ཞི་མཐུན་བརྟན་ལྷིང་བྱུང་འདུག་པས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྔར་བས་བརྟན་པོ་བཙུགས་ནས་རྒྱལ་ཁབ་ཀྱི་འཐབ་ཇུས་གལ་ཆེན་ལག་ལེན་བསྟར་བར་ཞབས་འདེགས་ཞུས་པ་ལས་བྱུང་བའི་གོ་སྐབས་བེད་སྤྱད་དེ་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་དོན་ཆེན་བཞིར་དམ་འཛིན་ཡག་པོ་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་ཉིང་ཁྲིའི་ལག་ལེན་ལ་སྐུལ་འདེད་ཧུར་ཐག་གཏོང་དགོས་ཞེས་གསུངས་པ་རེད།

ཀྲུང་དབྱང་དམག་ཨུད་ཀྱི་ཨུ་ཡོན་དང་ཀྲུང་དབྱང་སྐུ་ཚབ་ཚོགས་པའི་ཚོགས་གཙོ་གཞོན་པ་ཀྲང་ཧྲེང་མིན་གྱིས་ལྷོ་ཁའི་ཡན་ལག་སྐུ་ཚབ་ཚོགས་པའི་སྣེ་ཁྲིད་དེ་ལྷོ་ཁ་གྲོང་ཁྱེར་སྣེ་གདོང་ཆུས་བཀྲ་ཤིས་མཆོད་རྟེན་སྡེ་ཁུལ་དང་ཁེ་གསུམ་སྡེ་ཁུལ་དུ་ཕེབས་ནས། མཛེས་མཐུན་གྲོང་གསེབ་འཛུགས་སྐྲུན་དང་། མངོན་མིན་རིག་གནས་ཤུལ་བཞག་རྒྱུན་འཛིན་དང་སྲུང་སྐྱོང་། བོད་ཀྱི་དམངས་གཙོའི་བཅོས་སྒྱུར་གྱི་གྲོང་ཚོ་དང་པོ་སོགས་ཀྱི་གནས་ཚུལ་མཁྱེན་རྟོགས་གནང་བ་དང་སྦྲགས་གྲོང་མིའི་ཁྱིམ་དུ་ཕེབས་ནས་འཚམས་འདྲི་ཡང་གནང་བ་རེད། དེ་རྗེས་སྐུ་ཚབ་ཚོགས་པ་ལྷོ་ཁ་ཡན་ལག་དམག་ཁུལ་ཁང་དང་གཞི་རིམ་དཔུང་སྡེར་ཕེབས་ནས་གཞི་རིམ་གྱི་བརྒྱ་ཤོག་འཛུགས་སྐྲུན་གནས་ཚུལ་ལ་བརྟག་ཞིབ་གནང་བ་དང་འབྲེལ་དཔོན་དམག་ཚོར་འཚམས་འདྲི་ཡང་གནང་བ་དང་། ལྷོ་ཁ་གྲོང་ཨུད་ཀྱི་སྒོ་རའི་ནང་ལྷོ་ཁ་གྲོང་ཁྱེར་གྱི་འགོ་ཁྲིད་ཚན་ཁག་གི་ཁོངས་མི་དང་དེ་བཞིན་མི་རིགས་ཁག་དང་ལས་རིགས་ཁག་གི་འཐུས་མིར་འཚམས་འདྲི་གནང་བ་དང་འབྲེལ་ལྷན་བཞུགས་སྐུ་པར་ཡང་བསྐྱོན་པ་རེད། ཕྱི་དྲོར། སྐུ་ཚབ་ཚོགས་པ་སྡེ་ཁུལ་དང་། འདེབས་འཛུགས་རྟེན་གཞི། ཚན་རྩལ་ཀུང་སི་བཅས་ལ་ཕེབས་ནས་ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་ཁྲིད་སྟོན་དང་། ཁྱད་ལྡན་ཐོན་ལས་འཕེལ་རྒྱས། མི་མེད་གནམ་གྲུའི་འཕྲལ་སྡོམ་རོགས་སྐྱོབ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཀྲང་ཧྲེང་མིན་གྱིས། ལྷོ་ཁ་གྲོང་ཁྱེར་གྱིས་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་དོན་ཆེན་བཞིར་མུ་མཐུད་དམ་འཛིན་གཏིང་ཟབ་བྱེད་དགོས། ཡུལ་བབ་དང་བསྟུན་ནས་ས་མཐོའི་ཁྱད་ལྡན་ལེགས་ཆའི་ཐོན་ལས་དང་། ལྷག་པར་དུ་ཁྱད་ལྡན་ཞིང་འབྲོག་ལས་དང་ནུས་རྒྱུ་གཙང་མའི་ཐོན་ལས་འཕེལ་རྒྱས་གཏོང་དགོས། སྐྱེ་ཁམས་ཤེས་དཔལ་འཛུགས་སྐྱོང་ལ་ཤུགས་སྣོན་བརྒྱབ་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་ཐབས་ཧུར་ཐག་བྱེད་དགོས་ཞེས་གསུངས་པ་རེད།།