ཟླ ༡ ཚེས ༢༨ ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཙམ་པབ་ཝེའི་བཅིངས་འགྲོལ་དམག་འཁྲུག་གི་འཐབ་འཛིང་པ་རྒན་གྲས་ལ་འཕྲིན་ལན་སྤྲིངས་གནང་བ་རེད།

ཞི་ཅིན་ཕིང་གིས། ཁྱེད་ཚོ་གཞོན་ནུའི་དུས་ལ་མི་རིགས་བཅིངས་འགྲོལ་གྱི་རླབས་ཆེན་བྱ་གཞག་ནང་ཞུགས་ཏེ། ཕ་ཡུལ་དང་ཁ་བྲལ་ནས་ཀྲུང་གོ་དང་ལས་འབྲེལ་བཟང་པོ་དང་འཐབ་འཛིང་གི་མཛའ་སེམས་ཟམ་མོ་བཙུགས་པ་མ་ཟད། དུས་ད་ལྟའི་བར་དུའང་ཀྲུང་གོ་དང་ཙམ་པབ་ཝེ་དང་། ཀྲུང་གོ་དང་ཨ་ཧྥེ་རི་ཁ་གླིང་དབར་གྱི་མཛའ་གྲོགས་ལ་སེམས་ཁུར་གནང་གི་ཡོད་པས། དེ་ནི་མི་རྣམས་སེམས་འགུལ་ཐེབས་སུ་འཇུག་པ་ཞིག་རེད་ཅེས་བསྟན་གནང་ཡོད།

ཞི་ཅིན་ཕིང་གིས། ༢༠༢༦ ལོ་ནི་ཀྲུང་གོ་དང་ཨ་ཧྥེ་རི་ཁའི་དབར་ཕྱི་འབྲེལ་བཙུགས་ནས་ལོ ༧༠ འཁོར་བའི་དུས་ཡིན་ལ།  ཀྲུང་གོ་དང་ཨ་ཧྥེ་རི་ཁའི་མི་ཆོས་རིག་གནས་སྤེལ་རེས་ཀྱི་ལོ་ཡང་ཡིན། ལོ་ངོ་ ༧༠ སོང་རིང་། ཀྲུང་གོ་ནི་ཐོག་མཐའ་བར་གསུམ་དུ་ཨ་ཧྥེ་རི་ཁ་གླིང་གི་མི་རིགས་བཅིངས་འགྲོལ་དང་འཕེལ་རྒྱས་དར་རྒྱས་བྱ་གཞག་གི་འཐབ་གྲོགས་བཟང་པོ་དང་། རོགས་ཟླ་ཡག་པོ་ཞིག་ཡིན་ཞིང་། ཨ་ཧྥེ་རི་ཁ་གླིང་གི་གྲོགས་པོ་དང་ཕན་ཚུན་བརྩི་འཇོག་དང་ཕན་ཚུན་རྒྱབ་སྐྱོར་བྱས་ཏེ། ལག་གདང་སྦྲེལ་ནས་སྤྱིར་བཏང་མིན་པའི་ལོ་ཟླ་བརྒྱུད་དེ། དེང་རབས་ཅན་གྱི་རྒྱང་ལམ་གསར་པར་མཉམ་དུ་བསྐྱོད་ཡོད། ཀྲུང་གོ་ཕྱོགས་ཀྱིས་ཀྲུང་གོ་དང་ཨ་ཧྥེ་རི་ཁ་གླིང་མཉམ་ལས་གླེང་སྟེགས་པེ་ཅིང་དབུ་ཚོགས་ཀྱི་གྲུབ་འབྲས་དོན་འཁྱོལ་བྱ་རྒྱུ་གོ་སྐབས་སུ་བརྩིས་ནས། ཨ་ཧྥེ་རི་ཁ་གླིང་ཕྱོགས་དང་སྲོལ་རྒྱུན་གྱི་མཛའ་གྲོགས་རྒྱུན་འཛིན་བྱས་ཏེ། ཀྲུང་གོ་དང་ཨ་ཧྥེ་རི་ཁ་གླིང་གི་འབྲེལ་བའི་སྔར་ལས་འོད་སྟོང་འཕྲོ་བའི་འབྱུང་འགྱུར་ཐུན་མོང་ཐོག་གཏོད་འདོད་ཡོད། ཁྱེད་ཚོས་ཨ་ཧྥེ་རི་ཁ་གླིང་གི་གཞོན་ནུ་དེ་བས་མང་བ་ཀྲུང་གོ་དང་ཙམ་པབ་ཝེ་དང་། ཀྲུང་གོ་དང་ཨ་ཧྥེ་རི་ཁ་གླིང་གི་མཛའ་གྲོགས་བྱ་གཞག་ནང་ཞུགས་རྒྱུར་སྐུལ་ཁྲིད་བྱ་རྒྱུའི་རེ་བ་ཡོད་ཅེས་ནན་སྟོན་གནང་ཡོད།

ཞི་ཅིན་ཕིང་གིས། ཀྲུང་གོའི་ལུགས་རྙིང་རྟ་ལོའི་དཔྱིད་གསར་དུས་ཆེན་སླེབས་ཉེར་ཡོད་པས། ཀྲུང་གོ་དང་ཨ་ཧྥེ་རི་ཁ་གླིང་ཕྱོགས་གཉིས་པོས་འབད་བརྩོན་ལྷོད་མེད་ཀྱི་གྱི་ལིང་སྙིང་སྟོབས་དར་སྤེལ་གཏོང་བ་དང་། ལག་གདང་སྦྲེལ་ནས་དུས་རབས་གསར་པའི་དུས་ནམ་ཀུན་གྱི་ཀྲུང་གོ་དང་ཨ་ཧྥེ་རི་ཁ་གླིང་གི་ལས་དབང་གཅིག་མཐུན་ཚོགས་པ་བསྐྲུན་ནས། ཀྲུང་གོ་དང་ཨ་ཧྥེ་རི་ཁའི་མཛའ་གྲོགས་འབྲེལ་བའི་དུས་རབས་ཀྱི་ལེའུ་གསར་པ་མུ་མཐུད་རྩོམ་འབྲི་བྱ་རྒྱུའི་རེ་བ་ཡོད་ཅེས་ནན་སྟོན་གནང་བ་རེད།

ཀྲུང་གོ་གསར་པ་དབུ་བརྙེས་རྗེས། ཀྲུང་གོས་བློ་བརྟན་འགྱུར་མེད་ངང་ཨ་ཧྥེ་རི་ཁ་གླིང་གིས་བཙན་རྒྱལ་རིང་ལུགས་དང་མི་སེར་སྤེལ་བའི་རིང་ལུགས་ལ་ངོ་རྒོལ་བྱེད་པར་རྒྱབ་སྐྱོར་བྱས་པ་དང་ཨ་ཧྥེ་རི་ཁ་གླིང་གི་མི་རིགས་བཅིངས་འགྲོལ་ལ་རྒྱབ་སྐྱོར་བྱས་ཡོད། ཉེ་ཆར། ཙམ་པབ་ཝེ་བཅིངས་འགྲོལ་དམག་འཁྲུག་གི་འཐབ་འཛིང་པ་རྒན་གྲས་ཀྱིས་མིང་མཉམ་འགོད་ཀྱི་རྣམ་པའི་ཐོག་ནས་ཀྲུའུ་ཞི་ཞི་ཅིན་ཕིང་ལ་འཕྲིན་ཡིག་ཕུལ་ནས། ཀྲུང་གོས་ཙམ་པབ་ཝེའི་མི་རིགས་བཅིངས་འགྲོལ་ལ་རྩ་ཆེའི་རྒྱབ་སྐྱོར་གནང་བར་སེམས་གཏིང་ནས་ཐུགས་རྗེ་ཆེ་ཞུས་པ་དང་། ཀྲུའུ་ཞི་ཞི་ཅིན་ཕིང་གིས་འགོ་ཁྲིད་གནང་བའི་ཀྲུང་གོ་གུང་ཁྲན་ཏང་དང་ཀྲུང་གོའི་མི་དམངས་ལ་དུས་རབས་གསར་པར་རླབས་ཆེའི་གྲུབ་འབྲས་ཐོབ་པ་དང་། ཀྲུང་གོ་རྣམ་པའི་དེང་རབས་ཅན་གྱི་བགྲོད་ལམ་བཏོད་པ། འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་ལ་རྩ་ཆེའི་དཔྱད་གཞི་མཁོ་འདོན་བྱས་པ་བཅས་ལ་བརྩི་འཇོག་དང་ཡིད་སྨོན་ཞུས་པ་དང་། ཀྲུང་གོ་དང་ཙམ་པབ་ཝེའི་དུས་ནམ་ཀུན་གྱི་ལས་དབང་གཅིག་མཐུན་ཚོགས་པར་སེམས་གཏིང་ནས་སྤོབས་པ་ཆེན་པོ་སྐྱེས་པ་དང་། རྒྱལ་ཁབ་གཉིས་པོའི་མཛའ་གྲོགས་བྱ་གཞག་རྒྱུན་འཛིན་ཐད་མུ་མཐུད་འབད་བརྩོན་བྱ་རྒྱུ་ཡིན་པ་བསྟན་ཡོད།།