ཉེ་ཆར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ཁྲོན་བོད་ལྕགས་ལམ་འཛུགས་སྐྲུན་འགན་གཙང་འགན་ལེན་གྱི་སྐུལ་འདེད་ཚོགས་འདུ་འཚོགས་ནས། ཁྲོན་བོད་ལྕགས་ལམ་འཛུགས་སྐྲུན་གྱི ༢༠༢༢ ལོ་འཁོར་གྱི་འགན་གཙང་འགན་ལེན་ལས་དོན་གྱི་གཙོ་གནད་དང་དམིགས་ཚད་ལས་འགན་ལ་ཞིབ་འཇུག་གྲོས་བསྡུར་དང་། ཁྲོན་བོད་ལྕགས་ལམ་འཛུགས་སྐྲུན་ལ་སྐུལ་འདེད་གཏོང་བའི་འབྲེལ་ཡོད་གཙོ་གནད་ལས་དོན་བཀོད་སྒྲིག་གནང་བ་རེད།

ཚོགས་ར།

ཝང་ཅུན་ཀྲེང་གིས་ནན་བཤད་གནང་དོན།རིམ་པ་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་བཏང་སྟེ། རང་རྟོགས་ངང་ཁྲོན་བོད་ལྕགས་ལམ་འཛུགས་སྐྲུན་གྱི་ལས་དོན་ཁག་ཏང་དང་རྒྱལ་ཁབ་ཀྱི་སྤྱི་ཡོངས་ཁྲོད་བཞག་ནས། འཆར་འགོད་དང་སྐུལ་འདེད་བཏང་སྟེ་ལས་གྲྭ་འཛུགས་སྐྲུན་ལ་སྐུལ་འདེད་བརྟན་པོ་གཏོང་བ་དང་། བདེ་འཇགས་ཀྱི་ཉེན་ཁ་སྔོན་འགོག་ཚོད་འཛིན་གྱི་ནུས་པ་ཆེ་རུ་གཏོང་བ། ལས་ཡུལ་གྱི་བདེ་འཇགས་དོ་དམ་གྱི་ཆུ་ཚད་མཐོ་རུ་གཏོང་བ། སྐྱེ་ཁམས་ཁོར་ཡུག་སྲུང་སྐྱོང་ལ་ཤུགས་སྣོན་རྒྱག་པ། ལྕགས་ལམ་གྱིས་རྒྱལ་ཇུས་དམངས་འཚོར་ཞབས་འདེགས་ཞུ་བའི་ནུས་པ་འདོན་པར་བྱས་རྗེས་དེ་བས་ཆེ་བ་འཇོག་པ་བཅས་བྱས་ཏེ། འགོ་འཛུགས་ས་མཐོ་པོ་དང་། ཚད་གཞི་མཐོ་པོ། སྤུས་ཚད་མཐོ་པོ་བཅས་ཀྱི་སྒོ་ནས་མཐུན་སྒྲིལ་གྱི་ལམ་བུ་དང་བདེ་སྐྱིད་ཀྱི་ལམ་བུ་ཡིན་པའི་ཁྲོན་བོད་ལྕགས་ལམ་འདི་ཉིད་འཛུགས་སྐྲུན་ཡག་པོ་བྱེད་དགོས།

ཝང་ཅུན་ཀྲེང་གིས་ནན་བཤད་གནང་དོན།ལམ་རྒྱུད་འཕེལ་རྒྱས་ལ་དམིགས་ཏེ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་དང་ཚང་དགོས་པ་གསུམ་དང་ཕན་འདོགས་པ་གཅིག་མཐའ་འཁྱོངས་ཀྱིས་ལྕགས་ལམ་འཛུགས་སྐྲུན་གྱི་གོ་སྐབས་དམ་འཛིན་ལྷོད་མེད་བྱེད་པ་དང་། ལམ་རྒྱུད་ས་ཁུལ་གྱི་རྣམ་གསར་གྲོང་ཁྱེར་དང་གྲོང་རྡལ་ཅན་ལ་སྤྱི་འདོམས་སྐུལ་འདེད་བཏང་ཁར་ལམ་རྒྱུད་གྲོང་ཁྱེར་དང་གྲོང་རྡལ་གྱི་ངེས་གནས་དང་། ཐོན་ལས་ཀྱི་བཀོད་པ། རྨང་གཞིའི་སྒྲིག་བཀོད་འཛུགས་སྐྲུན་བཅས་སྔོན་ཚུད་ནས་ཇུས་འགོད་དང་ཚན་རིག་དང་མཐུན་པའི་འཆར་འགོད་བྱེད་པ་མ་ཟད། ལམ་རྒྱུད་གྲོང་ཁྱེར་དང་གྲོང་རྡལ་སྤུས་སྤོར་རིམ་འཕར་དང་། ཐོན་ལས་འཕེལ་རྒྱས་ཕྱོགས་སྒྱུར་དང་ཕན་འབྲས་ཆེ་རུ་གཏོང་བ། མང་ཚོགས་ཀྱི་འཚོ་བ་རྒྱུན་མཐུད་ལེགས་གཏོང་བཅས་ལ་སྐུལ་འདེད་མྱུར་པོ་བཏང་ནས། ས་ཁོངས་དཔལ་འབྱོར་འཕེལ་རྒྱས་ཀྱི་གསར་གཏོད་སྒུལ་ཤུགས་ཆེ་རུ་གཏོང་དགོས། ལྕགས་ལམ་དང་ས་གནས་ཀྱི་མཉམ་ལས་ཇེ་ཟབ་ཏུ་བཏང་སྟེ་མང་ཚོགས་ལས་ཞུགས་གཞན་སྒྱུར་བྱེད་པའི་ཡིད་དབང་ཧུར་ཐག་འགུག་པ་དང་། སློབ་ཆེན་སློབ་མར་གསར་གཏོད་ལས་གཏོད་ཀྱི་ཁྲིད་སྟོན་བྱེད་པ། འཛུགས་སྐྲུན་གཉེར་སྐྱོང་གི་ཤེས་ལྡན་པ་གསོ་སྐྱོང་བྱེད་པ། དམངས་ཕྱུག་ཐོན་ལས་འཕེལ་རྒྱས་གཏོང་བ་བཅས་བྱས་ནས། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་བཏང་སྟེ་དཔེ་སྟོན་ལས་གྲྭ་གཏོད་དགོས། སྐྱེ་ཁམས་ཁོར་ཡུག་སྲུང་སྐྱོང་ལ་དམིགས་ཏེ། སྐྱེ་ཁམས་ཁོར་ཡུག་སྲུང་སྐྱོང་གི་བྱ་ཐབས་ནན་པོ་ལག་བསྟར་བྱེད་པ་དང་། སྐྱེ་ཁམས་ཁོར་ཡུག་སྲུང་སྐྱོང་གི་ཨར་སྐྲུན་བྱེད་ཐབས་དང་བཟོ་སྐྲུན་ལག་རྩལ་སྔོན་ལ་འདེམས་སྤྱོད་བྱེད་པ། སྐྱེ་ཁམས་སླར་གསོ་བཅོས་སྐྱོང་ལ་སྐུལ་འདེད་ཧུར་ཐག་གཏོང་བ། ཆུ་ཚད་མཐོ་པོར་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་སྲུང་སྐྱོང་དང་སྐུལ་འདེད་གཏོང་བ། སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་ཆུ་ཚད་དེ་བས་མཐོ་བའི་སྲུང་སྐྱོང་མངོན་འགྱུར་ཡོང་བ་བཅས་བྱས་ཏེ་ལྗང་མདོག་ལས་གྲྭ་གཏོད་དགོས། རྣམ་གྲངས་དོ་དམ་ལ་དམིགས་ཏེ། བརྟན་ཐོག་ཡར་འཕེལ་གྱི་ལས་ཀའི་རྩ་བའི་དགོངས་གཞི་མཐའ་འཁྱོངས་ཀྱིས་གནས་ཚུལ་གསར་པར་ཞིབ་འཇུག་དང་། གནད་དོན་གསར་པ་ཐག་གཅོད། བྱ་ཐབས་གསར་པ་འཚོལ་ཞིབ་བཅས་བྱེད་པ་དང་། གཙོ་རྒྱུའི་ཞབས་འདེགས་ཀྱི་འགན་ལེན་ལ་ཤུགས་སྣོན་རྒྱག་པ། ཚད་ལྡན་ཅན་གྱི་དོ་དམ་ལ་སྐུལ་འདེད་གཏིང་ཟབ་གཏོང་བ། ལས་གྲྭ་ཧྲིལ་པོའི་སྤུས་ཚད་ལེགས་སུ་གཏོང་བ་བཅས་བྱས་ཏེ་སྤུས་ལེགས་ལས་གྲྭ་གཏོད་དགོས། ཉེན་ཁ་དོ་དམ་ཚོད་འཛིན་ལ་དམིགས་ཏེ། བདེ་འཇགས་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱེད་པ་དང་། བདེ་འཇགས་ཐོན་སྐྱེད་ཀྱི་འགན་འཁྲིའི་ལམ་ལུགས་དོན་འཁྱོལ་ནན་ཏན་བྱེད་པ། ས་གཤིས་དང་། ལས་གྲྭ ཁོར་ཡུག་སོགས་ཀྱི་ཉེན་ཁ་སྔོན་འགོག་ཚོད་འཛིན་ལ་ཤུགས་སྣོན་རྒྱག་པ། མེ་ཟོན་དང་། འབྲུབ་འགོག གནོད་འཚེ་སྔོན་འགོག་སོགས་ཀྱི་འཕྲལ་སྡོམ་དོ་དམ་ཡག་པོ་བྱེད་པ། ལས་གྲྭའི་བདེ་འཇགས་ལ་ཕྱོགས་ཡོངས་ནས་ལྟ་སྐུལ་བྱེད་ཤུགས་ཆེ་རུ་གཏོང་བ་བཅས་བྱས་ཏེ་བདེ་འཇགས་ལས་གྲྭ་གཏོད་དགོས། ལག་རྩལ་གྱི་ཁྲིད་སྟོན་ལ་དམིགས་ཏེ། ཚན་རྩལ་གསར་གཏོད་ཀྱི་འགག་རྩའི་རང་བཞིན་གྱི་ནུས་པ་འདོན་པ་དང་། ལས་གྲྭ་འཛུགས་སྐྲུན་དང་འབྲེལ་བ་ཡོད་པའི་བློ་འདྲིའི་ལས་དོན་ཞིབ་ཚགས་ངང་ཡག་པོ་སྒྲུབ་པ། ཚན་ཞིབ་ཀྱི་གྲུབ་འབྲས་ས་ཆ་དེ་རང་དང་ཐག་ཉེ་སར་གཞན་སྒྱུར་བྱེད་པར་སྐུལ་འདེད་གཏོང་བ། རྒྱལ་ཁབ་ཀྱི་ཁྲོན་བོད་ལྕགས་ལམ་ལག་རྩལ་གསར་གཏོད་ལྟེ་གནས༼བོད་ལྗོངས༽ལས་འགོ་བཙུགས་ནས་འཛུགས་སྐྲུན་བྱེད་པར་སྐུལ་འདེད་ཧུར་ཐག་གཏོང་བ་བཅས་བྱས་ཏེ་གསར་གཏོད་ཀྱི་ལས་གྲྭ་གཏོད་དགོས། ལྟ་སྐུལ་དོ་དམ་དང་ཚོད་འཛིན་ལ་དམིགས་ཏེ། ཏང་སྲོལ་སྲིད་གཙང་འཛུགས་སྐྱོང་ལ་ཤུགས་སྣོན་རྒྱག་པ་དང་ལས་གྲྭ་འཛུགས་སྐྲུན་ལ་ཁྲིམས་དང་སྒྲིག་སྲོལ་ལྟར་དོ་དམ་བྱེད་ཤུགས་ཆེ་རུ་བཏང་སྟེ་དྭངས་གཙང་ལས་གྲྭ་གཏོད་དགོས།།