སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་ངེས་ནས་ཀྲུང་ཧྭའི་ཆུ་གསོག་མཐོ་ལྕོག་སྲུང་སྐྱོང་ཡག་པོ་བྱེད་དགོས་ཞེས་པ་སྟེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་མཚོ་སྔོན་དུ་རྟོག་ཞིབ་གནང་བར་ཕེབས་པར་ལན་ཆ་བཟང་པོ་བྱུང་བ།

ཉེ་ཆར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་རྟོག་ཞིབ་གནང་སྐབས། མཚོ་སྔོན་གྱི་འབྱུང་ཁམས་ཁོར་ཡུག་སྲུང་སྐྱོང་ཡག་པོ་བྱེད་རྒྱུ་ནི་རྒྱལ་ཁབ་ཀྱི་དོན་ཆེན་ཡིན། སྔོ་ལྗང་རི་ཆུ་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོ་བཙུགས་ཏེ། གོ་ལའི་གླིང་སྣེ་གསུམ་པའི་འབྱུང་ཁམས་ལ་སྲུང་སྐྱོབ་ཏན་ཏིག་བྱེད་དགོས་ཞེས་ནན་སྟོན་གནང་ཡོད། མཚོ་སྔོན་གྱི་རྒྱ་ཆེའི་ལས་བྱེད་པ་དང་མང་ཚོགས་ཚོས། སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་ངེས་ནས། འབྱུང་ཁམས་སྲུང་སྐྱོབ་བྱ་རྒྱུ་ཨང་དང་པོར་བཞག་སྟེ་ཀྲུང་ཧྭའི་ཆུ་གསོག་མཐོ་ལྕོག་ལ་ཐུན་མོང་ཐོག་སྲུང་སྐྱོང་ཡག་པོ་བྱས་ཐོག མཚོ་བོད་ས་མཐོའི་འབྱུང་ཁམས་སྲུང་སྐྱོབ་དང་སྤུས་ཚད་མཐོ་བའི་གོང་འཕེལ་ལ་སྐུལ་འདེད་གཏོང་རྒྱུའི་ཐད་གྲུབ་འབྲས་གསར་པ་ཟམ་མི་ཆད་པར་ཐོབ་པ་བྱ་རྒྱུ་ཡིན་ཞེས་བསྟན་ཡོད་པ་རེད།

མཚོ་སྔོན་པོའི་ཁེ་རམས་ཐང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་པོའི་ཁོར་ཡུག་ཕྱོགས་བསྡུས་བཅོས་སྐྱོང་དང་སྐྱེ་དངོས་སྣ་མང་རང་བཞིན་སྲུང་སྐྱོང་ལས་དོན་གྱི་ཕན་འབྲས་ལ་གཟིགས་ཞིབ་གནང་ཡོད། ཁོང་གིས། མཚོ་སྔོན་པོའི་འབྱུང་ཁམས་སྲུང་སྐྱོབ་དང་ཁོར་ཡུག་བཅོས་སྐྱོང་ལ་ཐོབ་པའི་གྲུབ་འབྲས་ནི་ལས་སླ་པོར་བྱུང་བ་ཞིག་མིན་པས། གཅེས་སྤྲས་ཆེན་པོ་དང་སྲ་བརྟན་དང་རྒྱ་སྐྱེད་ཟམ་མི་ཆད་པར་གཏོང་དགོས་ཞེས་ནན་སྟོན་གནང་བ་དང་། ཞི་ཅིན་ཕིང་གིས། མཚོ་སྔོན་གྱི་འབྱུང་ཁམས་འཛུགས་སྐྲུན་ཡག་པོ་དང་འབྱུང་ཁམས་ཐོན་ཁུངས་སྲུང་སྐྱོབ་ཡག་པོ་བྱས་ནས། རྒྱལ་ཁབ་སྤྱི་གླིང་འཛུགས་སྐྲུན་ཡག་པོ་བྱེད་དགོས། འདི་ནི་ང་ཚོའི་ནོར་བུ་ཡིན་ལ་ཐོན་ཁུངས་དང་རྒྱུ་ནོར་ཡང་ཡིན་ཞེས་གསུངས་ཡོད་པ་རེད།

མཚོ་སྔོན་པོའི་མཛེས་ལྗོངས་ཁུལ་སྲུང་སྐྱོབ་བེད་སྤྱོད་དོ་དམ་ཅུད་ཡུལ་སྐོར་དོ་དམ་ཁྲུའུ་ཡི་འགོ་འཛིན་ཁྲེན་ཏེ་ཧུའེ་ཡིས། སྤྱི་ཁྱབ་ཧྲུའུ་ཅིའི་བཀའ་མོལ་གྱིས་ཚང་མར་སྐུལ་མ་ཆེན་པོ་ཐེབས་བྱུང་ཞེས་བསྟན་པ་དང་། ཁོང་གིས།མཚོ་སྔོན་པོའི་ཁུལ་དུ་འཚོ་སྡོད་བྱེད་མཁན་ངོས་ནས་བརྗོད་ན། ང་ཚོས་མཚོ་སྔོན་པོའི་བརྙན་ཤེལ་གཅིག་དང་ཁུལ་དྲུག སྟེགས་བུ་གཅིག་བཅས་འཛུགས་སྐྲུན་དང་། རྒྱལ་ཁབ་སྤྱི་གླིང་གི་དཔེ་སྟོན་ཞིང་ཆེན་འཛུགས་སྐྲུན། འབྱུང་ཁམས་དཔལ་ཡོན་གྱི་མཐོ་ས་བདུན་འཛུགས་སྐྲུན་བཅས་ལ་དམིགས་པ་དང་། དུས་མཚུངས་སུ་རྒྱལ་སྤྱིའི་འབྱུང་ཁམས་ཡུལ་སྐོར་བྱ་ཡུལ་གཏོད་རོགས་བྱ་རྒྱུར་མཚོ་སྔོན་པོའི་སྟོབས་ཤུགས་ལེགས་སྐྱེས་སུ་འབུལ་རྒྱུ་དང་ངེས་པར་དུ་འབྱུང་ཁམས་སྲུང་སྐྱོབ་ཀྱི་འགན་འཁྲི་མཐའ་གཅིག་ཏུ་ཁུར་ནས། ང་ཚོའི་མཚོ་སྔོན་པོའི་འབྱུང་ཁམས་སྲུང་སྐྱོབ་བཅོས་སྒྲིག་ལ་དམིགས་ཏེ། རྒྱལ་ཁབ་ཀྱི་འབྱུང་ཁམས་བདེ་འཇགས་སྲུང་ར་བརྟན་དུ་གཏོང་ཐུབ་པའི་ཡིད་ཆེས་སྔར་བས་ཆེ་རུ་ཕྱིན་སོང་ཞེས་བསྟན་ཡོད་པ་རེད།

ཁེ་རམས་ཐང་ནི་མཚོ་སྔོན་པོ་རྒྱུག་ཁོངས་ཀྱི་དཔེ་མཚོན་འདམ་ར་ཡིན་པ་དང་། ས་ཁོངས་ནང་གི་ཆུ་རྒྱུད་དང་། གྲམ་ཐང་། ཆུ་སྐྱེས་རྩི་ཤིང་གི་རིགས་ཕུན་སུམ་ཚོགས་པོ་ཡོད་པས། སྔོ་ཁེབས་ཁྱབ་ཚད་བརྒྱ་ཆ ༩༥ ཟིན་ཡོད་ལ། གསེར་ཉ་དང་། ཆུ་སྐྱར་མགོ་ནག ཆུ་བྱ་གཞན་སོགས་འདབ་ཆགས་རིགས་བཅུ་གྲངས་དང་ངང་དཀར་ཆེ་གྲས་ཀྱི་འཚོ་གནས་བྱ་ཡུལ་གལ་ཆེན་ཞིག་ཀྱང་ཡིན། མཚོ་སྔོན་པོའི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུད་ཀྱི་འགོ་འཛིན་ཧོ་ཡུས་པང་གིས། མཚོ་སྔོན་པོ་ནི་ཆུ་དང་ཉ། འདབ་ཆགས་བཅས་མཉམ་དུ་འཚོ་གནས་བྱེད་པའི་འབྱུང་ཁམས་མ་ལག་ཅིག་ཡིན་པ་དང་། ད་ཆ་མཚོ་སྔོན་པོའི་ཆུ་བྱའི་ཁྱུ་ཚོགས་ཀྱི་གྲངས་འབོར་མང་དུ་ཕྱིན་ནས་ཁྲི ༤༠ ཙམ་ཟིན་པ་མ་ཟད། དེའི་སྣེ་རིགས ༦༩ ནས ༩༥ བར་མང་དུ་ཕྱིན་ཡོད། ང་ཚོས་སླད་ཕྱིན་གྱི་ལས་དོན་ཁྲོད། ངེས་པར་དུ་སྤྱི་ཁྱབ་ཧྲུའུ་ཅིའི་འབྱུང་ཁམས་ཤེས་དཔལ་དགོངས་པ་ལག་བསྟར་གཏིང་ཟབ་བྱས་ཏེ་མཚོ་སྔོན་པོའི་མཛེས་སྡུག་དེ་ང་ཚོའི་དམིགས་འབེན་ལ་བརྩིས་ཐོག མཚོ་སྔོན་པོའི་མཛེས་དཔལ་ནམ་ཡང་རྒྱས་ཤིང་སྔོ་ལྗང་རི་ཆུ་ཉམས་མེད་ཡུན་གནས་ཐུབ་པ་བྱ་རྒྱུ་ཡིན་ཞེས་བསྟན་ཡོད་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ས་མཐོའི་དམིགས་བསལ་ཐོན་ཁུངས་ཀྱི་ཁྱད་ཆོས་ལ་གཞི་ཚུགས་པ་དང་། གསར་དར་ཐོན་ལས་སྐྱེད་སྲིང་ཧུར་ཐག་བྱས་ཏེ་འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་མགྱོགས་སུ་བཏང་ཐོག རྒྱལ་ཁབ་ཀྱི་ནུས་རྒྱུ་གཙང་མའི་ཐོན་ལས་ཀྱི་མཐོ་ས་དང་། རྒྱལ་སྤྱིའི་འབྱུང་ཁམས་ཡུལ་སྐོར་བྱ་ཡུལ། ལྷད་མེད་སྐྱེ་ལྡན་གྱི་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་བཅས་གཏོད་དགོས་ཞེས་གསུངས་ཡོད་པ་རེད།

མཚོ་སྔོན་ཞིང་ཆེན་འབྱུང་ཁམས་ཁོར་ཡུག་ཐིང་ཏང་ཙུའུ་ཡི་ཧྲུའུ་ཅི། ཐིང་ཀྲང་ཐང་དབན་ཧྥེང་གིས། སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་ངེས་ནས་སྦགས་མེད་ཐཱན་ཉུང་ཡོང་འཕེལ་རྒྱུན་འཁྱོངས་བྱས་ནས། ས་གནས་ཀྱི་ཁྱད་ཆོས་ལྡན་པའི་སྤུས་ཚད་མཐོ་བའི་གོང་འཕེལ་གྱི་ལམ་བུའི་ཐོག་བསྐྱོད་རྒྱུ་ཡིན་ཞེས་བསྟན་ཡོད་པ་རེད།།