ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་ནས་སྤྱི་ཟླ ༦ པའི་ཚེས ༢༧ ཉིན་ཨན་ཧུའེ་ཞིང་ཆེན་ཐའེ་ཧོ་རྫོང་གི་འབྲུ་འདེབས་དུད་ཚང་ཆེན་མོ་ཞུས་ཙུང་ཞང་ལ་འཕྲིན་ལན་སྤྲིངས་ནས་ས་གནས་དེ་གའི་ཡུལ་མི་ཚོར་འཚམས་འདྲི་ཞུས་གནང་བ་དང་རྒྱལ་ཡོངས་ཀྱི་འབྲུ་འདེབས་དུད་ཚང་ཆེན་མོར་ཐུགས་རེ་ཆེན་པོ་བཅོལ་གནང་ཡོད།

ཞི་ཅིན་ཕིང་གི་འཕྲིན་ལན་ནང་། ངས་ཁྱེད་རང་ནི་ཨན་ཧུའེ་ཐའེ་ཧོ་ཡི་འབྲུ་འདེབས་མཁན་འཇོན་ཐང་ཅན་ཞིག་ཡིན་པ་ངེས་ཡོད། ཁྱེད་ཚོས་བཏབ་པའི་གྲོ་ལ་ལོ་ལེགས་བྱུང་བ་དང་བུ་ཚ་རྣམས་ཀྱིས་ཀྱང་ཁྱེད་དང་ལྷན་དུ་ཞིང་ལས་བྱེད་ཀྱི་ཡོད་པ་ཤེས་རྟོགས་བྱུང་བས། ང་རང་ཧ་ཅང་དགའ་པོ་བྱུང་ཞེས་གསུངས་ཡོད།

ཞི་ཅིན་ཕིང་གིས། ལག་པར་འབྲུ་རིགས་ཡོད་ན་སེམས་ནང་དངངས་འཚབ་མེད། འབྲུ་རིགས་ཐོན་སྐྱེད་ཐད་ངས་ཐོག་མཐའ་བར་གསུམ་དུ་དོ་ཁུར་ཆེན་པོ་བྱེད་ཀྱི་ཡོད། གཞི་རིམ་དུ་བརྟག་ཞིབ་བྱེད་སྐབས་ཀྱང་རྟག་ཏུ་ཞིང་ནང་དང་མུ་ཁར་ལྟ་བར་འགྲོ་གི་ཡོད། ལོ་འདི་དག་གི་རིང་ལ། ཏང་ཀྲུང་དབྱང་གིས་འབྲུ་རིགས་ཐོན་སྐྱེད་ལ་རྒྱབ་སྐྱོར་བྱེད་པའི་སྲིད་ཇུས་དང་བྱེད་ཐབས་རབ་དང་རིམ་པ་བཏོན་པ་ནི་ཀྲུང་གོ་བའི་ལྟོ་ཕོར་རང་ཉིད་ཀྱི་ལག་ཏུ་དམ་པོར་བཟུང་རྒྱུ་དང་འབྲུ་རིགས་འདེབས་མཁན་ཞིང་པར་ཡོང་འབབ་ཡོད་པ་དང་ཁེ་ཕན་རག་ཏུ་བཅུག་ནས་འཚོ་བ་ཉིན་རེ་ལས་ཉིན་རེར་ཇེ་བཟང་དུ་འགྲོ་ཐུབ་པ་བྱ་རྒྱུ་དེ་རེད། འབྲུ་འདེབས་དུད་ཚང་ཆེན་མོས་གཞི་ཁྱོན་ལྡན་པའི་གཉེར་སྐྱོང་གི་བཟང་ཆ་འདོན་སྤེལ་བྱས་ཏེ། དེང་རབས་ཀྱི་ཞིང་ལས་ཚན་རྩལ་བེད་སྤྱོད་ཧུར་ཐག་བྱས་ཐོག་རྒྱ་ཆེའི་ཞིང་དུད་ཆུང་བས་འབྲུ་རིགས་མང་ཙམ་འདེབས་པ་དང་སྤུས་ལེགས་འབྲུ་རིགས་འདེབས་རྒྱུར་སྐུལ་ཁྲིད་བྱས་ནས་རྒྱལ་ཁབ་ཀྱི་འབྲུ་རིགས་བདེ་འཇགས་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུའི་རེ་བ་ཡོད་ཅེས་གསུངས་གནང་ཡོད།

ཞུས་ཙུང་ཞང་ནི་ཨན་ཧུའེ་ཞིང་ཆེན་ཧྥུའུ་དབྱང་གྲོང་ཁྱེར་ཐའེ་ཧོ་རྫོང་ཅིའུ་ཤན་གྲོང་རྡལ་ཀྲང་ཁུའེ་གྲོང་ཚོའི་ཞིང་པ་ཡིན་པ་དང་། ཐོག་མཐའ་བར་གསུམ་དུ་བློ་རྩེ་གཅིག་སྒྲིམ་གྱིས་ཞིང་ལས་ཚན་རིག་ལག་རྩལ་ལ་བརྩོན་ཞིབ་བྱེད་ཀྱི་ཡོད། སྤྱི་ལོ ༢༠༡༠ ལོར་སྣེ་ཁྲིད་དེ་ཞིང་ལས་འདེབས་འཛུགས་ཆེད་ལས་མཉམ་ལས་ཁང་བཙུགས་པ་དང་། རིམ་བཞིན་ས་གནས་དེ་གའི་འབྲུ་འདེབས་དུད་ཚང་ཆེན་མོར་གྱུར་ཏེ། རྒྱལ་ཡོངས་ཀྱི་ངལ་རྩོལ་དཔེ་བཟང་དང་རྒྱལ་ཡོངས་ཀྱི་འབྲུ་འདེབས་དཔེ་སྟོན་དམག་སོགས་ཀྱི་གཟི་བརྗིད་མཚན་སྙན་ཐོབ་ཡོད། སྤྱི་ལོ ༢༠༡༡ ལོའི་ཟླ ༤ པར། ཞི་ཅིན་ཕིང་ཀྲང་ཁུའེ་གྲོང་ཚོར་རྟོག་ཞིབ་གནང་བར་ཕེབས་སྐབས་ཁོང་དང་ཡུལ་མི་ཚོའི་ས་ནས་གྲོ་འདེབས་ཚུལ་མཁྱེན་རྟོགས་གནང་བ་རེད། ཉེ་ཆར། ཞུས་ཙུང་ཞང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་སྤྲིངས་ནས་ལོ་བཅུ་ལྷག་ཙམ་རིང་འབྲུ་རིགས་ཐོན་སྐྱེད་དང་མང་ཚོགས་དབུལ་སྒྲོལ་ཐད་རོགས་རམ་བྱས་ཚུལ་སོགས་ཀྱི་གནས་ཚུལ་དང་མྱོང་ཚོར་སྙན་སེང་ཞུས་པ་དང་། ཞིང་ལས་ཞིབ་འཇུག་གསར་སྤེལ་དང་ཁྱབ་གདལ་གྱི་ལས་དོན་མུ་མཐུད་དེ་ཡག་པོ་སྒྲུབ་སྟེ་ཞིང་པ་དེ་བས་མང་བས་འབྲུ་རིགས་མང་ཙམ་འདེབས་པ་དང་སྤུས་ལེགས་འབྲུ་རིགས་འདེབས་རྒྱུར་སྣེ་ཁྲིད་བྱ་རྒྱུའི་ཆོད་སེམས་མཚོན་པར་བྱས་ཡོད།།