ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་ཉེ་ཆར་ཀྲུང་གོ་ཞིང་ལས་སློབ་ཆེན་ཚན་རྩལ་གླིང་ཆུང་གི་སློབ་གྲོགས་ཚོར་འཕྲིན་ལན་སྤྲིངས་ནས་ཐུགས་རེ་ནན་པོ་བཅོལ་བ་དང་འབྲེལ། ལྔ་བཞི་གཞོན་ནུའི་དུས་ཆེན་འཆར་བའི་སྐབས་སུ་རྒྱལ་ཡོངས་ཀྱི་རྒྱ་ཆེའི་གཞོན་ནུ་ཚོར་དུས་ཆེན་གྱི་རྟེན་འབྲེལ་ཞུས་གནང་བ་རེད།

ཞི་ཅིན་ཕིང་གིས་འཕྲིན་ལན་ནང་། ཚང་མས་སློབ་གྲྭས་བཙུགས་པའི་ཚན་རྩལ་གླིང་ཆུང་བརྒྱུད་ཞིང་ནང་མུ་ཁ་དང་གྲོང་ཚོ་ཞིང་དུད་བཅས་སུ་བསྐྱོད་དེ་གྲོང་གསེབ་དར་རྒྱས་ལ་ཞབས་འདེགས་ཞུ་བའི་ཁྲོད་དམངས་འཚོར་རྒྱུས་ལོན་དང་ཤེས་ཡོན་སྦྱོང་བཞིན་ཡོད་པ་ཤེས་རྟོགས་བྱུང་བས། ང་རང་ཧ་ཅང་དགའ་པོ་བྱུང་ཞེས་འཁོད་ཡོད་པ་རེད།

ཞི་ཅིན་ཕིང་གིས། ཁྱེད་ཚོས་འཕྲིན་ཡིག་ནང་། ཀྲུང་གོའི་གྲོང་གསེབ་ཏུ་ཟབ་སྐྱོད་བྱས་རྗེས་གཞི་ནས་ཅི་ཞིག་ནི་དངོས་ཐོག་བདེན་འཚོལ་ཡིན་པ་དང་གང་འདྲ་བྱས་ནས་མང་ཚོགས་དང་འབྲེལ་བ་བྱེད་དགོས་པ་ཤེས་རྟོགས་གཏིང་ཟབ་བྱུང་། གཞོན་ནུས་དཀའ་སྤྱད་འབད་འཐབ་བྱེད་དགོས་ངེས་ཡིན་ཞེས་བྲིས་འདུག་པས། ཧ་ཅང་ཡག་པོ་བཤད་འདུག དུས་རབས་གསར་པའི་ཀྲུང་གོའི་གཞོན་ནུ་ཚོར་སྙིང་སྟོབས་འདི་འདྲ་ཞིག་ཡོད་དགོས། ཏང་གི་ཚོགས་ཆེན་ཉི་ཤུ་པའི་ཐོག་ཞིང་ལས་སྟོབས་ཆེན་རྒྱལ་ཁབ་འཛུགས་སྐྲུན་བྱེད་པའི་ཐད་བཀོད་སྒྲིག་བྱས་ཡོད་པས། སློབ་གྲོགས་ཚོས་མིག་རྒྱང་རིང་ཞིང་ཏན་ཏན་ཏིག་ཏིག་ངང་སློབ་ཁང་དུ་སློབ་སྦྱོང་བྱ་རྒྱུ་དང་གྲོང་གསེབ་ཏུ་ལག་ལེན་བསྟར་རྒྱུ་གཉིས་ཟུང་འབྲེལ་དམ་པོ་བྱེད་པ་དང་། ཞིང་ལས་ལ་དགའ་ཞེན་བྱེད་པའི་བརྩེ་བ་ཟབ་མོ་དང་ཞིང་ལས་དར་རྒྱས་གཏོང་བའི་འཇོན་ཐང་ཆེ་རུ་བཏང་བ་བརྒྱུད་གྲོང་གསེབ་དར་རྒྱས་གཏོང་བའི་གར་སྟེགས་ཆེན་པོའི་ཐོག་བྱས་རྗེས་བཞག་ནས། ཞིང་ལས་དང་གྲོང་གསེབ་དེང་རབས་ཅན་དུ་འགྱུར་བར་སྐུལ་འདེད་ཇེ་མགྱོགས་གཏོང་བ་དང་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྲུན་བྱ་ཆེད་ལང་ཚོའི་སྟོབས་ཤུགས་ལེགས་སྐྱེས་སུ་འབུལ་རྒྱུའི་རེ་བ་ཡོད་ཅེས་ནན་སྟོན་གནང་ཡོད།

༢༠༠༩ ལོར་ཀྲུང་གོ་ཞིང་ལས་སློབ་ཆེན་གྱིས་ཧོ་པེ་ཞིང་ཆེན་ཆུས་ཀྲོའུ་རྫོང་དུ་ཚན་རྩལ་གླིང་ཆུང་འཛུགས་རྒྱུའི་འཚོལ་ཞིབ་བྱས་ཤིང་། ཞིང་ལས་ཆེད་ལས་བསླབ་གནས་ཀྱི་ཞིབ་འཇུག་སློབ་མ་ཞིང་ལས་ཐོན་སྐྱེད་ཀྱི་འཐབ་ཕྱོགས་དང་པོར་མངག་གཏོང་བྱས་ཏེ། ཤེས་བྱ་དང་རིགས་པའི་གཞུང་ལུགས་སློབ་སྦྱོང་ལེགས་སྒྲུབ་བྱེད་པའི་རྨང་གཞིའི་ཐོག་ཞིང་ལས་དང་གྲོང་གསེབ་འཕེལ་རྒྱས་ཁྲོད་ཀྱི་དངོས་ཡོད་གནད་དོན་ཞིབ་འཇུག་ཐག་གཅོད་བྱེད་ཏུ་བཅུག་པ་དང་། ཞིང་ལས་ཀྱི་མཐོ་རིམ་ཤེས་ལྡན་པ་གསོ་སྐྱོང་བྱས་ནས་ཞིང་ལས་དང་གྲོང་གསེབ་དེང་རབས་ཅན་འཛུགས་སྐྲུན་ལ་ཞབས་འདེགས་ཞུས་ཡོད། མིག་སྔར། སློབ་གྲྭ་དེས་རྒྱལ་ཡོངས་ཀྱི་ཞིང་ལྗོངས་དང་གྲོང་ཁྱེར ༢༤ ཡི་རྫོང་དང་གྲོང་ཁྱེར་ཆུས་ཆི་བཅས ༩༡ ལ་ཚན་རྩལ་གླིང་ཆུང་ ༡༣༩ བཙུགས་ཡོད་པ་རེད། ཉེ་ཆར། ཀྲུང་གོ་ཞིང་ལས་སློབ་ཆེན་ཚན་རྩལ་གླིང་ཆུང་གི་སློབ་མའི་འཐུས་མིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་བསྐུར་ནས་ཁོང་ཚོའི་སློབ་སྦྱོང་གི་གྲུབ་འབྲས་དང་མྱོང་ཚོར་སྙན་སེང་ཞུས་པ་དང་ཞིང་ལས་སྟོབས་ཆེའི་རྒྱལ་ཁབ་འཛུགས་སྐྲུན་ཆེད་ལེགས་སྐྱེས་འབུལ་རྒྱུའི་ཆོད་སེམས་བརྟན་པོ་མཚོན་པར་བྱས་པ་རེད།།