ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པ་ཧང་ཀྲོའུ་རུ་གཟབ་རྒྱས་ངང་འགོ་ཚུགས་པ།

ཞི་ཅིན་ཕིང་འགོ་ཚུགས་མཛད་སྒོར་ཕེབས་ནས་སྐབས་འདིའི་ལུས་རྩལ་འགྲན་ཚོགས་འགོ་ཚུགས་པའི་ཁྱབ་བསྒྲགས་གནང་བ།

ཟླ ༩ ཚེས ༢༣ ཉིན་གྱི་དགོང་མོ། ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པ་ཀྲེ་ཅང་ཞིང་ཆེན་ཧང་ཀྲོའུ་གྲོང་ཁྱེར་དུ་གཟབ་རྒྱས་ངང་འགོ་ཚུགས་ཤིང་། འདི་ནི་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུའུ་ཞིའི་སྡིངས་ཆ་ནས་ཚང་མར་ཕྱག་གཡུག་གཡུག་གནང་བཞིན་པ།

ཟླ ༩ ཚེས ༢༣ ཉིན་གྱི་དགོང་མོ། ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པ་ཀྲེ་ཅང་ཞིང་ཆེན་ཧང་ཀྲོའུ་གྲོང་ཁྱེར་དུ་གཟབ་རྒྱས་ངང་འགོ་ཚུགས་ཤིང་། འདི་ནི་ཞི་ཅིན་ཕིང་དང་། ཚའེ་ཆི། ཏིང་ཤུའེ་ཞང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་འགོ་ཚུགས་མཛད་སྒོར་ཞུགས་པ།

ཚའེ་ཆི་དང་། ཏིང་ཤུའེ་ཞང་། དེ་བཞིན་ཨེ་ཤེ་ཡའི་ས་གནས་ཁག་ནས་ཡོང་བའི་འགོ་ཁྲིད་པ་དང་སྐུ་མགྲོན་སོགས་ཞུགས་པ།

ཚེས ༢༣ ཉིན་གྱི་དགོང་མོ། ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པ་ཀྲེ་ཅང་ཞིང་ཆེན་ཧང་ཀྲོའུ་གྲོང་ཁྱེར་དུ་གཟབ་རྒྱས་ངང་འགོ་ཚུགས་ཤིང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་འགོ་ཚུགས་མཛད་སྒོར་ཕེབས་ནས་སྐབས་འདིའི་ཨེ་ཤེ་ཡའི་ལུས་རྩལ་འགྲན་ཚོགས་འགོ་ཚུགས་པའི་ཁྱབ་བསྒྲགས་གནང་བ་རེད།

ཚའེ་ཆི་དང་། ཏིང་ཤུའེ་ཞང་། དེ་བཞིན་ཨེ་ཤེ་ཡའི་ས་གནས་ཁག་ནས་ཡོང་བའི་འགོ་ཁྲིད་པ་དང་སྐུ་མགྲོན་སོགས་འགོ་ཚུགས་མཛད་སྒོར་ཞུགས་པ་རེད།

ཆུ་ཚོད ༡༩ དང་སྐར་མ ༥༨ ཙམ་ལ། ༼ཞི་བདེ། ལས་དབང་གཅིག་མཐུན་འདུས་གྲུབ༽ཀྱི་རོལ་དབྱངས་ཁྲོད་ཞི་ཅིན་ཕིང་དང་སྐུ་ཟླ་ཕེང་ལི་ཡོན་གྱིས་ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ལས་ཚབ་ཀྲུའུ་ཞི་ཤིན་ཀེ་དང་རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཀྲུའུ་ཞི་པཱ་ཧོ་སོགས་དང་མཉམ་དུ་ཀྲུའུ་ཞིའི་སྡིངས་ཆར་ཕེབས་ནས་ལྟད་མོ་བ་ཚོར་ཕྱག་གཡུག་གཡུག་གིས་གུས་ལན་གནང་བས། ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་ཡུན་རིང་གྲགས།

ཆུ་ཚོད ༢༠ དང་སྐར་མ ༩ ཙམ་ལ། ལུས་རྩལ་པ་ལུས་རྩལ་ཐང་དུ་འཛུལ་འགོ་ཚུགས་ཤིང་། ༼ང་ཚོའི་ཨེ་ཤེ་ཡ༽ཞེས་པའི་གླུ་དབྱངས་ཀྱི་འགྱུར་ཁུག་སྙན་མོ་དང་བསྟུན་ནས། རྒྱལ་ཁབ་དང་ས་ཁུལ ༤༥ ནས་ཡོང་བའི་ལུས་རྩལ་འཐུས་མི་ཚོགས་པ་གཅིག་རྗེས་གཉིས་མཐུད་ངང་ལུས་རྩལ་ཐང་དུ་ཡོང་བས་ཚོགས་ར་ཡོངས་ཀྱི་ལྟད་མོ་བའི་དགའ་བསུ་ཆེན་པོ་ཐོབ་པ་རེད། ༼མེས་རྒྱལ་ལ་བསྟོད་གླུ་ལེན༽ཞེས་པའི་སེམས་ཤུགས་རབ་ཏུ་རྒྱས་པའི་འགྱུར་ཁུག་གྲགས་མ་ཐག་མགྲོན་བདག་རྒྱལ་ཁབ་ཀྲུང་གོའི་འཐུས་མི་ཚོགས་པ་ལུས་རྩལ་ཐང་དུ་རུ་སྟར་གྱི་མཇུག་ཤོས་སུ་འཛུལ་ཡོང་བ་དང་།　ཞི་ཅིན་ཕིང་གིས་ཡར་བཞེངས་ནས་ཁོང་ཚོར་ཕྱག་གཡུག་གཡུག་གིས་གུས་ལན་གནང་བས། ལུས་རྩལ་ཐང་ཡོངས་སུ་དགའ་འབོད་དང་ཐལ་མོའི་རྡེབ་སྒྲ་ཡང་ནས་ཡང་དུ་གྲགས། ཀྲུང་གོའི་འཐུས་མི་ཚོགས་པར་ཁྱོན་མི ༡༣༢༩ ཡོད་པ་དང་། དེའི་ནང་འགྲན་བསྡུར་ལ་ཞུགས་མཁན་ལུས་རྩལ་པ ༨༨༦ ཡོད་པ་དང་། ཁོང་ཚོ་སྐབས་འདིའི་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་རྣམ་གྲངས་ཆེ་གྲས ༣༨ དང་རྣམ་གྲངས་ཆུང་གྲས ༤༠༧ གྱི་འགྲན་བསྡུར་ནང་ཞུགས་རྒྱུ་རེད།

ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྒྲིག་འཛུགས་ཨུ་ལྷན་གྱི་ཀྲུའུ་ཞི་དང་ཀྲེ་ཅང་ཞིང་ཆེན་གྱི་ཧྲེང་ཀྲང་ཝང་ཧའོ་ཡིས་ཤིས་ཚིག་སྒྲོན་སྐབས། སྒྲིག་འཛུགས་ཨུ་ལྷན་དང་ཀྲེ་ཅང་གི་མི་དམངས་ཁྲི ༦༥༠༠ ཡི་ཚབ་ཞུས་ནས་ཨེ་ཤེ་ཡའི་རྒྱལ་ཁབ་དང་ས་ཁུལ་ཁག་ནས་ཡོང་བའི་ལུས་རྩལ་པར་སྤྲོ་སེམས་འཁོལ་བའི་དགའ་བསུ་ཞུས་པ་དང་འབྲེལ་ཁོང་ཚོར་གྲུབ་འབྲས་བཟང་པོ་ཐོབ་པ་དང་། ཕུགས་འདུན་འགྲུབ་པ། མཛའ་གྲོགས་ཟབ་ཏུ་འགྲོ་བ། བདེ་སྐྱིད་ཐོབ་པ་བཅས་བྱུང་སྟེ་མཛེས་སྡུག་ལྡན་པའི་ཧང་ཀྲོའུ་རུ་ཨེ་ཤེ་ཡའི་ལུས་རྩལ་འགྲན་ཚོགས་ལ་ཞུགས་པ་དེ་ཚེ་གང་རིང་བརྗེད་པར་དཀའ་བར་འགྱུར་བའི་སྨོན་འདུན་ཡང་ཞུས་པ་རེད།

ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྒྲིག་འཛུགས་ཨུ་ལྷན་གྱི་ཀྲུའུ་ཞི་དང་ཀྲུང་གོ་ཨོ་ལིམ་ཕིག་ཨུ་ལྷན་གྱི་ཀྲུའུ་ཞི་ཀའོ་ཀྲི་ཏན་གྱིས་ཤིས་ཚིག་སྒྲོན་སྐབས། ཀྲུའུ་ཞི་ཞི་ཅིན་ཕིང་དང་ཀྲུང་གོ་སྲིད་གཞུང་གི་བྱམས་བརྩེའི་ཐུགས་ཁུར་དང་འགྱུར་མེད་སྟོབས་ལྡན་གྱི་འགོ་ཁྲིད་འོག ངོ་མཚར་ཆེ་བའི་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་འདུ་ཚོགས་གཟབ་རྒྱས་ཤིག་འགོ་ཚུགས་གྲབས་ཡོད། ང་ཚོས་ཨོ་ལིམ་ཕིག་གི་སྙིང་སྟོབས་དར་སྤེལ་གཏོང་བ་དང་ནུས་ཤུགས་ཡོད་རྒུས་ཨེ་ཤེ་ཡའི་ལུས་རྩལ་གྱི་ཟིན་ཐོ་གསར་པ་བཏོད་དེ་ཨེ་ཤེ་ཡའི་ལས་དབང་གཅིག་མཐུན་འདུས་གྲུབ་ཀྱི་འཆར་འགོད་རི་མོ་གསར་རྐྱང་ཞིག་མཉམ་དུ་འབྲི་དགོས་ཞེས་བརྗོད་པ་རེད།

ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ལས་ཚབ་ཀྲུའུ་ཞི་ཤིན་ཀེས་ཤིས་ཚིག་སྒྲོན་སྐབས། ཀྲུང་གོ་སྲིད་གཞུང་དང་། ཀྲུང་གོ་ཨོ་ལིམ་ཕིག་ཨུ་ཡོན་ལྷན་ཁང་། ཀྲེ་ཅང་ཞིང་ཆེན་སྲིད་གཞུང་། ཧང་ཀྲོའུ་གྲོང་ཁྱེར་སྲིད་གཞུང་། ཨེ་ཤེ་ཡའི་ལུས་རྩལ་འགྲན་ཚོགས་སྒྲིག་འཛུགས་ཨུ་ལྷན། ཧང་ཀྲོའུ་ཡི་གྲོང་མི་དང་དེ་བཞིན་གྲ་སྒྲིག་ལས་དོན་ནང་ཞུགས་མཁན་མི་སྣ་ཚང་མར་ལྷག་བསམ་ཟོལ་མེད་ཀྱི་གུས་འདུད་ཞུས་ནས་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་གྲ་སྒྲིག་ལས་དོན་ལ་གྲུབ་འབྲས་བཟང་པོ་ཐོབ་ཡོད་ཅེས་བསྔགས་བརྗོད་བྱས་པ་དང་། ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ལ་ཞུགས་མཁན་ཚང་མར་ཚེ་གང་རིང་བརྗེད་པར་དཀའ་བའི་དྲན་ཤེས་ཡག་པོ་ཞིག་ཡོང་ངེས་ཡིན་པའི་ཡིད་ཆེས་ཡོད་ཅེས་བརྗོད་པ་རེད།

ཆུ་ཚོད ༢༡ དང་སྐར་མ ༡༦ ཙམ་ལ་འགོ་ཚུགས་མཛད་སྒོའི་མི་སེམས་རབ་ཏུ་འཁོལ་བའི་དུས་དེ་སླེབས་ཡོད། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པ་འགོ་ཚུགས་པའི་ཁྱབ་བསྒྲགས་གནང་བ་དང་། དེ་མ་ཉིད་དུ་ཚོགས་ར་ཡོངས་སུ་དགའ་སྤྲོའི་རྣམ་པས་ཁེངས་ཤིང་། མཛེས་སྡུག་རྣམ་པར་བཀྲ་བའི་གྲངས་འཛིན་གྱི་ཚོན་ཁྲའི་ཤོག་སྦག་སྤར་བས་ཚོགས་ར་ཡོངས་སུ་ཐལ་མོའི་རྡེབ་སྒྲ་དང་དགའ་འབོད་ཀྱི་སྒྲ་ཡང་ནས་ཡང་དུ་གྲགས།

རང་རྒྱལ་གྱི་ཕུལ་བྱུང་ལུས་རྩལ་པ་དང་རྩལ་འཁྲིད་པའི་འཐུས་མི ༨ ཀྱིས་ལག་ཏུ་ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ཚོགས་དར་འཁྱེར་ནས་ལུས་རྩལ་ཐང་དུ་འཛུལ་བ་རེད། ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ཚོགས་གླུ་བླངས་པ་དང་བསྟུན་ནས་ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ཚོགས་དར་དལ་བུར་བསྒྲེང་བ་དང་། དེ་སྐར་ལྔའི་དར་དམར་དང་མཉམ་དུ་ལྷབ་ལྷུབ་ངང་མཐོན་པོར་གཡོ།

ཆུ་ཚོད ༢༡ དང་སྐར་མ ༥༣ ཙམ་ལ་དཔལ་འབར་ཨ་མ་སྤོར་བའི་མཛད་སྒོ་འགོ་ཚུགས་པ་རེད།

ལུས་རྩལ་ཐང་དུ་ཡེ་ཧྲི་ཝུན་དང་། ཧྥན་ཀྲེན་ཏུང་། ཞུས་མོང་ཐའོ། ཧྲི་ཀྲི་ཡུང་། ལི་ལིང་ཝུའེ། དབང་ཧྲུན་སོགས་དཔལ་འབར་འཁྱེར་མཁན ༦ གིས་རྗེས་མཐུད་ནས་རྒྱུག་པས་ལུས་རྩལ་ཐང་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་གྲགས།

འགོ་ཚུགས་མཛད་སྒོར་ཞུགས་མཁན་རྒྱལ་སྤྱིའི་སྐུ་མགྲོན་གྱི་གྲས་སུ། ཁམ་ཕུ་ཁྲེའི་རྒྱལ་པོ་ཤིས་ཧཱ་མོ་ཉི་དང་། སི་རི་ཡའི་ཙུང་ཐུང་པཱ་ཧྲར་དང་སྐུ་ཟླ་ཨ་སི་མཱ། ཁུ་ཝེ་ཐེའི་རྒྱལ་རྒྱུད་འཛིན་མཁན་སྨི་ཧྲ་ལེ། ནེ་པ་ལའི་ཙུང་ལི་ཕུའུ་ལཱ་ཁྲང་ཏ། ཐི་མོར་ཤར་མའི་ཙུང་ལི་ཞ་ནཱ་ནཱ། ཧན་གོའི་ཙུང་ལི་ཧན་ཏེ་ཀྲུའུ། མ་ལེ་ཞི་ཡའི་རྒྱལ་ཚོགས་གྲོས་ཁང་འོག་མའི་གྲོས་དཔོན་ཙུའོ་ཧཱ་ལི་དང་སྐུ་ཟླ་ནུའོ་ལའེ་ཉི། དེ་བཞིན་པུ་རུ་ནེ་དང་སུའུ་ཏན་གྱི་འཐུས་མི་ཆིན་ཝང་སུའུ་ཧྥུའུ་ལི། ཁ་ཐར་ཚོ་དཔོན་གྱི་འཐུས་མི་ཆིན་ཝང་ཅའོ་ཨན། ཅོར་ཏན་གྱི་ཆིན་ཝང་ཧྥེ་སར། ཐེ་ལན་གྱི་སྲས་མོ་ཤིས་ལི་ཝན་ཝ་ལི་སོགས་རྒྱལ་ཚང་གི་འཐུས་མི་བཅས་ཡོད།

ཝང་དབྱི་དང་། ལི་ཀན་ཅེ། ཧོ་ལི་ཧྥུང་། ཝང་ཞའོ་ཧུང་། ཧྲེན་དབྱི་ཆིན་བཅས་འགོ་ཚུགས་མཛད་སྒོར་ཞུགས་ཡོད།

ཤང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལི་ཅ་ཁྲའོ་དང་། ཨའོ་མོན་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ཧོ་དབྱི་ཁྲེང་། ཀྲུང་གོ་གོ་མིན་ཏང་གི་ཀྲུའུ་ཞི་ཟུར་པ་ཧུང་ཤིའུ་ཀྲུའུ་བཅས་འགོ་ཚུགས་མཛད་སྒོར་ཞུགས་ཡོད།

ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་དཔོན་རིགས་སོགས་འགོ་ཚུགས་མཛད་སྒོར་ཞུགས་ཡོད།།