སྤྱི་ཚེས ༡༢ ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སྐབས་གསུམ་པའི་ཧྥ་རི་སིའི་ཞི་བདེའི་གླེང་སྟེགས་ཐོག་འགོ་བརྗོད་དུ་རིམས་ནད་ཐུན་མོང་ཐོག་འགོག་པ་དང་། སླར་གསོ་ལ་ལྷན་དུ་སྐུལ་འདེད་གཏོང་བ། ཞི་བདེར་མཉམ་དུ་ཇུས་འགོད་བྱེད་དགོས་ཞེས་འཁོད་པའི་བརྙན་མཐོང་ཤིས་ཚིག་གསུངས་པ་རེད།

ཞི་ཅིན་ཕིང་གི་ཤིས་ཚིག་ནང་། མིག་སྔར། འཛམ་གླིང་གནས་སྟངས་ལ་འགྱུར་ལྡོག་མགྱོགས་པོ་འགྲོ་བཞིན་པ་དང་། སྲོལ་རྒྱུན་བདེ་འཇགས་དང་སྲོལ་རྒྱུན་མིན་པའི་བདེ་འཇགས་ཀྱི་ཉེན་ཁ་རིམ་པ་སྟར་ཆགས་སུ་ཐོན་བཞིན་པ། རྒྱལ་སྤྱིའི་དུས་བབ་ལ་བརྟན་པོ་མེད་པ་དང་གཏན་འཁེལ་མེད་རང་བཞིན་མངོན་གསལ་དོད་དུ་འགྲོ་བཞིན་ཡོད། གོ་ལ་ཧྲིལ་པོའི་རང་བཞིན་གྱི་འཇིགས་སྐུལ་དང་འགྲན་རྩོད་ལ་གོ་ལ་ཧྲིལ་པོས་ཁ་གཏད་གཅོག་དགོས་ཞེས་བསྟན་གནང་ཡོད།

ཞི་ཅིན་ཕིང་ནས་གྲོས་འགོ་ཁག་གསུམ་སྟོན་གནང་བ་རེད།

གཅིག་ནི། མཐུན་སྒྲིལ་རོགས་རེས་དང་རིམས་ནད་མཉམ་དུ་འགོག་བཅོས་བྱེད་དགོས། ཏོག་གསར་གློ་ཚད་ཀྱི་རིམས་ནད་སྔར་བཞིན་གོ་ལ་ཧྲིལ་པོར་འགོས་ཁྱབ་འགྲོ་བཞིན་ཡོད། མི་དམངས་གོང་དུ་བཀུར་བ་དང་ཚེ་སྲོག་རྩ་བའི་རྩེ་ལ་འཛིན་པ་རྒྱུན་འཁྱོངས་བྱས་ཏེ། འཛམ་གླིང་འཕྲོད་བསྟེན་སྒྲིག་འཛུགས་ཀྱི་འགག་རྩའི་འགོ་ཁྲིད་ནུས་པ་འདོན་སྤེལ་གང་ལེགས་བྱེད་དགོས་པ་དང་། རྒྱལ་སྤྱིའི་མཉམ་འགོག་མཉམ་འཛིན་ལ་སྐུལ་འདེད་གཏོང་དགོས། ཀྲུང་གོས་མུ་མཐུད་དེ་རྒྱལ་ཁབ་ཁག་ལ་རིམས་འགོག་ཉམས་མྱོང་དང་ནད་རྟགས་ལག་རྩལ་མཉམ་སྤྱོད་བྱེད་པ་དང་། དགོས་ངེས་ཀྱི་སྨན་བཅོས་ནད་སྐྱོང་གི་དངོས་རྫས་མཁོ་འདོན་བྱེད་པ། ཀྲུང་གོའི་རིམས་འགོག་སྨན་དེ་གོ་ལ་ཧྲིལ་པོའི་སྤྱི་པའི་ཐོན་རྫས་ལ་བརྩི་རྒྱུ་ཁས་ལེན་བྱས་པ་ལག་ལེན་བསྟར་བ།

རྒྱལ་སྤྱིའི་སྤྱི་ཚོགས་དང་ལྷག་དོན་དུ་དར་རྒྱས་འགྲོ་བཞིན་པའི་རྒྱལ་ཁབ་ལ་གློ་བུར་དུ་ཐོན་པའི་སྤྱི་པའི་འཕྲོད་བསྟེན་བྱ་དོན་ལ་ཁ་གཏད་གཅོག་པའི་ནུས་པ་ཆེ་རུ་གཏོང་རྒྱུར་རོགས་རམས་བྱེད་པ་བཅས་བྱས་ཏེ། མིའི་རིགས་ཀྱི་འཕྲོད་བསྟེན་བདེ་ཐང་གི་གཅིག་མཐུན་མ་ལག་གཏོད་རྒྱུར་སྐུལ་འདེད་གཏོང་འདོད་ཡོད།

གཉིས་ནི། སྒོ་དབྱེ་མཉམ་ལས་དང་སླར་གསོ་ལ་མཉམ་དུ་སྐུལ་འདེད་གཏོང་བ། ཀྲུང་གོས་གོང་འཕེལ་གྱི་འདུ་ཤེས་གསར་པ་ལག་ལེན་བསྟར་རྒྱུ་དང་གོང་འཕེལ་གྱི་གནས་སྟངས་གསར་པ་ཆགས་པ་བྱེད་པ། སྤུས་མཐོའི་གོང་འཕེལ་ལ་སྐུལ་འདེད་གཏོང་རྒྱུ་ཡིན། ང་ཚོས་བློ་བརྟན་འགྱུར་མེད་ཀྱི་སྒོ་ནས་བསྒྱུར་བཅོས་གཏིང་ཟབ་དང་སྒོ་དབྱེ་རྒྱ་སྐྱེད་བཏང་ནས། རྒྱལ་སྤྱིའི་སྤྱི་ཚོགས་དང་ལྷན་དུ། གོ་ལ་ཧྲིལ་པོའི་ཐོན་ལས་སྦྲེལ་ཐག་དང་མཁོ་སྤྲོད་སྦྲེལ་ཐག་བརྟན་ལྷིང་ཡོང་བར་སྲུང་སྐྱོང་བྱེད་རྒྱུ་དང་། སྒོ་དབྱེ་རྣམ་པའི་འཛམ་གླིང་དཔལ་འབྱོར་འཛུགས་རྒྱུ་ཡིན། ཀྲུང་གོས་རྒྱལ་ཁབ་ཉི་ཤུ་ཚོགས་པས་བཏོན་པའི་ཆེས་དབུལ་ཕོངས་རྒྱལ་ཁབ་ཀྱི་བུ་ལོན་སྐྱིན་ཚབ་སྤྲོད་རྒྱུ་གནས་སྐབས་མཚམས་འཇོག་བྱེད་པའི་གྲོས་འགོ་དོན་འཁྱོལ་ཡག་པོ་བྱེད་རྒྱུ་དང་། ཧུར་བརྩོན་ཆེན་པོས་རྒྱལ་སྤྱི་གོང་འཕེལ་མཉམ་ལས་སྤེལ་རྒྱུ་ཡིན། ངོས་ནས་ཀྲུང་གོས་རྒྱལ་ཁབ་ཀྱི་རང་བདག་ལེགས་སྐྱེས་འབུལ་ནུས་ཆེ་རུ་གཏོང་རྒྱུ་དང་། སྤྱི་ལོ ༢༠༣༠ ལོའི་གོང་དབྱང་གཉིས་ཐན་འགྱུར་འབུད་བཤངས་བྱེད་ཚད་ཚད་མཐོ་ཤོས་ལས་མི་བརྒལ་བ་བྱེད་རྒྱུ། སྤྱི་ལོ ༢༠༦༠ ལོའི་གོང་ཐན་བཏང་སྙོམས་མངོན་འགྱུར་ཐུབ་པ་བྱེད་རྒྱུ་ཡིན་ལ། ཀྲུང་གོའི་ཕྱོགས་ནས་དེའི་དོན་དུ་ལག་བསྟར་འཆར་འགོད་བཟོ་རྒྱུའི་གྲོས་འགོ་འདོན་རྒྱུ་ཡིན། ཀྲུང་གོའི་ཕྱོགས་ནས་ཡོ་རོབ་ཕྱོགས་དང་ཧྥ་རན་སིའི་ཕྱོགས་དང་ལྷན་དུ་སང་ལོར་ཁག་སོ་སོར་སྐྱེ་དངོས་སྣེ་མང་རང་བཞིན་དང་གནམ་གཤིས་འགྱུར་བ། རང་བྱུང་སྲུང་སྐྱོབ་ཀྱི་རྒྱལ་སྤྱིའི་གྲོས་ཚོགས་སྐོང་འཚོག་བྱ་རྒྱུ་བཅས་གོ་སྐབས་སུ་བཟུང་ནས། འབྲེལ་ཡོད་མཉམ་ལས་གཏིང་ཟབ་ཏུ་གཏོང་འདོད་ཡོད།

གསུམ་ནི། དྲང་བདེན་རྒྱུན་འཁྱོངས་བྱས་ནས། ཞི་བདེ་ལ་སྲུང་སྐྱོབ་བྱེད་རྒྱུ། ཞི་བདེ་མཉམ་གནས་རྒྱུན་འཁྱོངས་དང་། རྒྱལ་ཁབ་ཁག་གི་གོང་འཕེལ་ཁེ་དབང་ལ་བརྩི་འཇོག་བྱེད་པ། རྒྱལ་ཁབ་ཁག་ནས་རང་གིས་བདམས་པའི་གོང་འཕེལ་གྱི་འགྲོ་ལམ་དང་མ་དཔེར་བརྩི་འཇོག་བྱེད་པ། ཕྱོགས་མང་རིང་ལུགས་རྒྱུན་འཁྱོངས་དང་ཕྱོགས་རྐྱང་པའི་རིང་ལུགས་དང་། བཙན་དབང་རིང་ལུགས། བཙན་དབང་ཆབ་སྲིད་བཅས་ལ་ངོ་རྒོལ་བྱེད་པ། རྣམ་པ་སྣ་ཚོགས་ཀྱི་འཇིགས་སྐུལ་རིང་ལུགས་དང་ཐལ་སྐྱོད་དྲག་ཤུགས་གཏུམ་སྤྱོད་ལ་ངོ་རྒོལ་བྱེད་པ་བཅས་བྱས་ཏེ། འཛམ་གླིང་གི་གཞུང་དྲང་དྲང་བདེན་དང་ཞི་བདེ་བདེ་འཇགས་ལ་སྲུང་སྐྱོབ་བྱེད་དགོས། ཀྲུང་གོས་རང་བཙན་རང་བདག་གི་ཞི་བདེའི་ཕྱི་འབྲེལ་སྲིད་ཇུས་ལག་ལེན་བསྟར་རྒྱུ་དང་། ཐོག་མཐའ་བར་གསུམ་དུ་ཞི་བདེ་གོང་འཕེལ་གྱི་ལམ་བུའི་ཐོག་ཏུ་རྒྱུན་བསྲིངས་ལྷོད་མེད་ངང་བསྐྱོད་རྒྱུ། ཀྲུང་གོའི་ཕྱོགས་ནས་རྒྱལ་ཁབ་ཁག་གིས་རྒྱལ་སྤྱིའི་བཅའ་ཁྲིམས་དང་རྒྱལ་སྤྱིའི་འབྲེལ་བའི་གཞི་རྩའི་ཚད་གཞིར་སྲུང་སྐྱོབ་བྱེད་རྒྱུ་དང་། གནས་ཚུལ་གྱི་ཡིན་མིན་དབྱེ་འབྱེད་ལ་གཞིགས་ནས་རང་ཉིད་ཀྱི་ལང་ཕྱོགས་ཐག་གཅོད་བྱེད་རྒྱུ། འདུ་ཤེས་འཛིན་སྟངས་ཕྱོགས་ཞེན་དང་ཁ་གཏད་དུ་ལངས་རིགས་དོར་དགོས་པ་བཅས་ཀྱི་རེ་འབོད་བྱེད་ཀྱི་ཡོད། ཀྲུང་གོ་དང་ཧྥ་རན་སི་རྒྱལ་ཁབ་ཉིས་ནི་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ལས་ལས་འཛིན་རྒྱལ་ཁབ་ཡིན། ཀྲུང་གོས་ཧྥ་རན་སི་ཚུད་པའི་རྒྱལ་ཁབ་ཁག་དང་སྦྲེལ་མཐུད་དང་མཐུན་སྦྱོར་ལ་ཤུགས་སྣོན་བརྒྱབ་སྟེ། ཆབ་སྲིད་ལ་བརྟེན་ནས་རྒྱལ་སྤྱི་དང་ས་ཁུལ་གྱི་གནད་དོན་ཐག་གཅོད་བྱེད་རྒྱུར་སྐུལ་འདེད་གཏོང་བ་དང་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོབ་ཐུབ་ཆེད་དུ་ལེགས་སྐྱེས་ཧུར་ཐག་འབུལ་འདོད་ཡོད་པ་བཅས་ཡིན།

ཞི་ཅིན་ཕིང་གིས་མཇུག་ཏུ། གནམ་འོག་ཀུན་ཕན་བདེན་པའི་ལམ་སྲོལ་སྐྱོང་། ཞི་བདེ་དང་གོང་འཕེལ་ནི་དུས་རབས་ཀྱི་བརྗོད་བྱ་གཙོ་བོ་ཡིན་ལ། འགོག་ཐབས་བྲལ་བའི་ལོ་རྒྱུས་ཀྱི་རླབས་རྒྱུན་ཡང་ཡིན། མིའི་རིགས་ལ་འཕྲད་པའི་འགྲན་རྩོད་ལ་ཕྱོགས་སྐབས། འཛམ་གླིང་རྒྱལ་ཁབ་ཁག་གིས་མཐུན་སྒྲིལ་ལ་ཤུགས་སྣོན་རྒྱག་པ་ལས་འགལ་ཟླ་བཟོ་མི་རུང་བ་དང་། མཉམ་ལས་ལ་སྐུལ་འདེད་གཏོང་བ་ལས་འགྲན་རྩོད་དང་འཁྲུག་རྐྱེན་སློང་མི་ཉན། ལག་གདང་སྦྲེལ་ནས་མིའི་རིགས་ཀྱི་ལས་དབང་གཅིག་མཐུན་མ་ལག་གཏོད་པ་དང་འཛམ་གླིང་རྒྱལ་ཁབ་ཁག་གི་མི་དམངས་ལ་བདེ་སྐྱིད་བསྐྲུན་དགོས་ཞེས་ནན་སྟོན་གནང་བ་རེད། །